A Xunta impulsa a mellora da eficiencia enerxética no campo de fútbol Os Medos na Pobra do Brollón cunha achega superior aos 51.000 €
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- A directora xeral de Administración Local visitou as instalacións para coñecer as actuacións executadas no marco das axudas do fondo adicional ao Fondo de Cooperación Local
- Actuouse no sistema de auga quente, na instalación eléctrica e na cubrición para impulsar o aforro enerxético e o confort das persoas usuarias
Estas imágenes pertenecen a Página Oficial de la Xunta de Galicia
A Pobra do Brollón (Lugo), 18 de marzo de 2025
A directora xeral de Administración Local, Natalia Prieto, xunto co delegado territorial da Xunta en Lugo, Javier Arias, visitou o campo de fútbol Os Medos, na Pobra do Brollón, para comprobar as melloras de eficiencia enerxética realizadas co apoio do Goberno galego. As obras contaron cunha achega de 51.600 euros do fondo adicional do Fondo de Cooperación Local, dotado con 5 millóns de euros.
As melloras centráronse no sistema de auga quente sanitaria, coa colocación de bombas de calor, no sistema eléctrico, coa substitución de luminarias e outras instalacións, e na cubrición con sistemas a base de panel sándwich. Segundo sinalou a directora xeral, os obxectivos das actuacións son favorecer o aforro enerxético e asegurar o máximo confort na práctica da actividade deportiva.
Natalia Prieto lembrou que desde a semana pasada xa está aberto o prazo da nova convocatoria das axudas do fondo adicional do Fondo de Cooperación Local para melloras de eficiencia enerxética, dirixida a concellos de menos de 15.000 habitantes, e animou as administracións locais a solicitalas. O orzamento para este exercicio mantense nos 5 millóns de euros.
Ademais de darlle prioridade a instalacións deportivas, educativas, sociais, sanitarias ou culturais, nesta liña valórase o tipo de investimento, con maior puntuación para a instalación de caldeiras alimentadas con enerxías renovables ou reformas de cubertas. A maiores, téñense en conta as melloras da envolvente térmica, na instalación eléctrica ou na iluminación, entre outras, así como a necesidade específica das actuacións previstas.
Achegas de ata 60.000 euros
As achegas poden ascender ata os 60.000 euros por concello, sen que a contía poida exceder o custo da actuación, que debe ser dunha única fase e supoñer a posta en servizo inmediata do proxecto.
A directora xeral explicou que a través desta medida se busca atender as necesidades das localidades de menor poboación, para garantir a mellor calidade na prestación de servizos municipais a toda a poboación galega, con independencia do lugar de residencia. No pasado exercicio houbo case un cento de concellos beneficiarios en toda Galicia. Deles, 18 son da provincia de Lugo, que recibiron achegas que suman máis de 900.000 euros.
A iniciativa enmárcase no apoio da Xunta ás administracións locais, co Fondo de Cooperación Local como instrumento central de colaboración económica para garantir a suficiencia financeira dos concellos. Natalia Prieto lembrou que neste exercicio o Fondo de Cooperación Local medra ata os 168 millóns de euros, 10 millóns máis que en 2024.
As axudas do fondo adicional súmanse ademais a outras convocatorias tamén xa publicadas, como a Orde de infraestruturas de uso público, dotada con 3,5 millóns de euros, o Fondo de Compensación Ambiental, que conta con máis de 11 millóns de euros, ou as axudas plurianuais á eficiencia enerxética cofinanciadas con fondos Feder e cun presuposto de 5 millóns de euros. A elas sumarase proximamente a da liña de apoio a proxectos estratéxicos do fondo adicional do Fondo de Cooperación Local, posta en marcha en 2024 e dotada con 8,5 millóns de euros.
As obras no campo de fútbol Os Medos forman parte do conxunto de actuacións impulsadas polo concello da Pobra do Brollón co apoio da Xunta a través das distintas ordes de axudas ás administracións locais. Neste marco de actuación o Goberno galego investiu nos últimos anos máis de 253.000 euros neste municipio.
