Villares destaca que festas como a do ourizo de San Cibrao poñen en valor a excelente calidade dos produtos marítimo-pesqueiros de Galicia

Cervo (Lugo), 15 de marzo de 2025

O conselleiro do Mar, Alfonso Villares, participou este sábado na 32 edición da Festa do Ourizo de San Cibrao, declarada de Interese Turístico Galego pola Xunta de Galicia en 2008, e que durante esta fin de semana converte a este municipio de A Mariña na capital galega deste equinodermo. Tal é así que, en palabras do responsable autonómico, eventos gastronómicos como o referido poñen en valor a excelente calidade dos produtos marítimos-pesqueiros que a cadea mar-industria pon a disposición dos consumidores e, de xeito paralelo, a riqueza cultural, turística e paisaxística dos territorios costeiros.

Para a exaltación deste apreciado manxar, que constitúe a base das diferentes receitas, é preciso recollelos os días previos para degustalos frescos ou cocidos, pois só serven os exemplares extraídos como moito tres días antes. Bares e restaurantes da vila prepárano de diferentes formas: en croquetas, en empanada, en tortilla, ao natural ou en pudin. A festa, que se celebra sempre nestas datas, xa que a tempada ideal para consumir os ourizo de mar sitúase entre os meses de xaneiro e marzo, arrancou ao mediodía cun showcooking cos cociñeiros Bruno Pena e Jesús Villarino, ademais da barista Sofía Prieto. Os asistentes puideron degustar este produto na Praza dos Campos e nos sete locais que se suman á xornada.

GALICIA SABE AMAR en Xove

Previamente, o máximo responsable de Mar achegouse ata unha das foodtrucks de GALICIA SABE AMAR que esta fin de semana recalou en Xove, co gallo da concentración da Asociación Galega de Autocaravanas. Trátase dun evento que reunirá ata o domingo entre un 150 e 180 vehículos que desprazarán a unhas 250 persoas, data na que está prevista a inauguración das áreas de autocaravanas do centro de Xove e da praia de Esteiro.