A Xunta actualiza a zona demarcada do nematodo do piñeiro das Neves e a aplicación de medidas de contención en áreas de Pontevedra e Ourense
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Estas medidas adóptanse porque, malia as actuacións realizadas, non foi posible erradicar este organismo nocivo e constatouse que a súa presenza foi continuada e progresiva e que o número de positivos foi en crecemento, sobre todo desde o 2018
- Decláranse, consonte á normativa da UE, medidas de control na zona demarcada das Neves e, ao tempo, unha nova zona demarcada neste concello pontevedrés, suxeita a medidas de contención, que substitúe á anterior área de erradicación
- A nova zona demarcada estará formada por unha área infestada e outra tampón de 20 quilómetros ao redor dela
Estas imágenes pertenecen a Página Oficial de la Xunta de Galicia
Santiago de Compostela, 14 de febreiro de 2025
O Diario Oficial de Galicia (DOG) publica hoxe a resolución da Consellería do Medio Rural pola que se declara a contención na zona demarcada das Neves (Pontevedra) do nematodo do piñeiro e, ademais, establécese a nova zona demarcada e as medidas para o control deste organismo de corentena. Esta norma publícase porque, malia as actuacións realizadas, non foi posible erradicar este organismo nocivo e constatouse que a súa presenza foi continuada e progresiva e que o número de positivos foi en crecemento, especialmente a partir do 2018.
Consonte a esta circunstancia, na resolución declárase, con base ao establecido na normativa comunitaria, a aplicación das medidas de contención na zona demarcada das Neves. Ao tempo, establécese unha nova zona demarcada neste mesmo concello, suxeita a medidas de contención, que substitúe á anterior área de erradicación. A nova zona demarcada estará formada por unha área infestada e outra tampón de 20 quilómetros ao redor da infestada. Na propia resolución pódese consultar o mapa con esta zonificación.
No mapa, a área infestada correspóndese coa delimitada dentro da liña vermella e a tampón, coa azul.
Así mesmo, na resolución defínense os concellos total ou parcialmente incluídos na zona demarcada.
Concellos total ou parcialmente incluídos na zona infestada:
A Cañiza, A Guarda, Arbo, As Neves, Baiona, Covelo, Crecente, Fornelos de Montes, Gondomar, Mondariz, Mondariz-Balneario, Mos, Nigrán, O Porriño, O Rosal, Oia, Pazos de Borbén, Ponteareas, Redondela, Salceda de Caselas, Salvaterra de Miño, Tomiño, Tui e Vigo, na provincia de Pontevedra.
Concellos total ou parcialmente incluídos na zona tampón:
A Arnoia, Avión, Bande, Beade, Beariz, Boborás, Carballeda de Avia, O Carballiño, Cartelle, Castrelo de Miño, Celanova, Cenlle, Cortegada, Entrimo, Gomesende, Leiro, Lobeira, Lobios, Melón, Padrenda, Pontedeva, Quintela de Leirado, Ramirás, Ribadavia, San Amaro, Toén e Verea, na provincia de Ourense.
A Cañiza, Bueu, Cangas, Cerdedo-Cotobade, Forcarei, Covelo, Crecente, Fornelos de Montes, A Lama, Marín, Moaña, Poio, Ponte Caldelas, Pontevedra, Pazos de Borbén, Redondela, Sanxenxo, Soutomaior, Vigo e Vilaboa, na provincia de Pontevedra.
Neste territorio da zona demarcada deberán executarse unha serie de medidas de contención que se explican na resolución. Algunhas delas obrigatorias, como, entre outras, as que teñen os propietarios das parcelas ou as administracións implicadas da zona infestada de cortar todas as árbores sensibles nas que se detecte a presenza do nematodo, así como de retirar e eliminar as plantas cortadas e os restos de corta tomando todas as precaucións necesarias para evitar a propagación do organismo e os seus vectores.
Ademais, os propietarios das parcelas ou as administracións implicadas da zona tampón teñen a obriga de identificar e cortar todas as plantas sensibles mortas, con mala saúde, ou afectadas por incendios forestais ou tormentas. A resolución tamén contempla unha serie de condicións para a circulación e traslado tanto das plantas como da madeira e a codia sensibles fóra das zonas demarcadas e de zona infestada á zona tampón.
Ligazón á resolución no DOG:
https://www.xunta.gal/dog/Publicados/2025/20250214/AnuncioG0426-060225-0001_gl.html
