A Xunta dota con 600.000 euros as axudas para a proxección exterior da música e as artes escénicas galegas
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Publícase no DOG esta convocatoria anual, para favorecer a presenza de empresas e artistas de Galicia en escenarios, festivais e mercados fóra da nosa Comunidade
- O prazo de presentación para estas subvencións, que se conceden por orde de solicitude ata o esgotamento do crédito, ábrese ás 9,00 h. do 21 de febreiro
Estas imágenes pertenecen a Página Oficial de la Xunta de Galicia
Santiago de Compostela, 11 de febreiro de 2025
O Diario Oficial de Galicia publica hoxe as bases da convocatoria anual de axudas ás actividades de distribución para industrias culturais coa prioridade de favorecer a presenza de artistas e empresas galegas de música e de artes escénicas en escenarios, festivais e mercados sectoriais fóra da nosa Comunidade. As axudas manteñen a dotación de 600.000 euros coas que xa foran dotadas en 2024, cando incrementaron o seu orzamento en máis dun 30% respecto ao ano anterior.
A súa concesión realizarase por orde de entrada entre as solicitudes que cumpran os requisitos, de xeito que o prazo de presentación estará aberto na sede electrónica da Xunta entre as 9,00 h. do 21 de febreiro ata as 14,00 h. do 21 de agosto ou ata o esgotamento do crédito.
A contía convocada repártese a partes iguais entre os dous ámbitos artísticos aos que se dirixen estas axudas, no marco das que se apoiarán accións desenvolvidas entre o 1 de novembro de 2024 e o 31 de outubro de 2025 tanto por profesionais autónomos como por empresas dedicadas á produción e distribución de espectáculos. A axuda máxima por solicitante é de 15.000 euros, que poderán ser distribuídos entre máis dunha modalidade.
Xiras e feiras internacionais
Financiaranse así parte dos custos das xiras de espectáculos galegos por escenarios e festivais fóra de Galicia, ademais da asistencia a feiras e mercados do sector que se celebren no resto de España ou no estranxeiro. No caso da categoría de artes escénicas, apóiase tamén a distribución artística dentro da nosa Comunidade, exceptuando os espectáculos programados na Rede Galega de Teatros e Auditorios, o circuíto promovido polo Goberno galego en colaboración con 42 entidades locais das catro provincias.
A Consellería de Cultura, Lingua e Xuventude xestiona anualmente estas subvencións co fin de impulsar a distribución e a comercialización exterior dos nosos produtos culturais, ao tempo que se facilita o acceso dos sectores da música e as artes escénicas galegas ao mercado internacional.
Mediante esta convocatoria o ano pasado cofinanciáronse os gastos asumidos por máis de 70 empresas no desenvolvemento de 110 accións de distribución, que sumaron preto de 600 funcións escénicas, concertos e accións promocionais nunha vintena de países e noutras 15 comunidades autónomas, así como dentro de Galicia no caso das xiras escénicas.
