A Xunta mobiliza xa máis de 200 M€ en licitacións para a construción de máis de 2.000 novas vivendas públicas
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Allegue anunciou que a partir de marzo se ampliará o Aval para que os adquirentes dunha vivenda protexida, sen límite de idade, accedan ao préstamo hipotecario polo 100% do prezo da vivenda, compatible tamén coas axudas a adquisición
- Detallou que onte rematou o prazo no que a Xunta recibiu 26 ofertas para redactar os Proxectos de Interese Autonómico para desenvolver solo para as primeiras 15.000 vivendas previstas en Vigo, Pontevedra, Santiago, Ourense, Lugo, Coruña e Arteixo
- Subliñou que os Orzamentos da Xunta deste ano reservan 240M€ nos que se triplica a partida destinada a vivenda pública e solo residencial
- Remarcou que o Programa Rexurbe, dotado de 7M€, permite rehabilitar inmobles en Betanzos, Ferrol, A Coruña, Mondoñedo, Viveiro, Vilalba, Ourense, Tui e Ribadavia e Ribadeo, que darán como resultado novas vivendas públicas
- Apuntou que a Xunta activou medidas excepcionais e modificacións lexislativas e fiscais para axilizar trámites para nova vivenda, incentivar a rehabilitación ou reducir taxas e custes tributarios
Santiago de Compostela, 11 de febreiro de 2025
A Xunta mobiliza xa máis de 200€ en licitacións para a construción de máis de 2.000 novas vivendas públicas.
A conselleira de Vivenda e Planificación de Infraestruturas, María M. Allegue, compareceu hoxe no Parlamento de Galicia, onde explicou que estes fogares se despregan en concellos coas maiores bolsas de demanda. Concretou que 832 teñen xa a obra licitada, e algunhas delas xa adxudicada ou en execución; 982 teñen o proxecto licitado; e outras 268 están a piques de licitarse nas vindeiras semanas.
Subliñou que se trata de novas vivendas públicas ás que se sumarán as procedentes de rehabilitación. A este respecto, o programa Rexurbe, cun orzamento de 7M€ posibilita recuperar vivendas na Coruña, Betanzos, Ferrol, Viveiro, Ourense, Ribadeo, Ribadavia ou Tui.
Fixo fincapé na aposta histórica da Xunta pola vivenda, tal como amosan os Orzamentos deste ano, que reservan 240M€ nos que se triplica a partida destinada a vivenda pública e solo residencial, pasando de 46M€ a 126M€ en 2025
Sinalou que estas cifras posibilitan avanzar no reto desta lexislatura, que é duplicar as vivendas públicas ata as 8.000 e facilitar solo para a construción de 25.000 novas, 20.000 delas protexidas.
Axudas á adquisición e alugueiro
A conselleira remarcou que a Xunta tamén destina este ano máis de 30M€ a cinco liñas de axuda tanto para alugueiro como para adquisición de vivenda.
Cómpre lembrar que recentemente o Goberno galego convocou por 3,8M€ axudas para menores de 36 anos e adquisición en concellos de menos de 10.000 habitantes; para compra de vivenda en centros históricos; ou para mercar vivendas de protección autonómica.
Allegue anunciou que a partir de marzo se ampliará o Aval da Xunta, para que os adquirentes dunha vivenda protexida, sen límite de idade, poidan acceder ao préstamo hipotecario polo 100% do prezo da vivenda. Este incentivo será compatible coas citadas axudas a adquisición, que poden chegar ata os 20.000€ para menores de 36 anos.
Ademais, a Xunta convocará neste mes o Bono Alugueiro Mocidade, cos fondos transferidos polo Goberno estatal, cuxa escaseza vén denunciando o Goberno galego.
Estratexia de solo residencial
Recordou que o Goberno galego, a través da Estratexia de Solo Residencia, tamén está a traballar con 15 concellos que ceden parcelas para construír vivendas. Neste sentido, os Proxectos de Interese Autonómico (PIA) permitirán desenvolver, polo de agora, máis de 1,5 millóns de m2 de solo residencial para as primeiras 15.000 vivendas previstas en Vigo, Pontevedra, Santiago, Ourense, Lugo, Coruña e Arteixo.
Apuntou que onte rematou o prazo para a presentación das ofertas para a redacción destes proxectos, licitados por importe de 2,6M€, e ás que se presentaron 26 ofertas.
Subliñou que a Xunta tamén puxo en marcha a Sociedade de Vivenda Pública de Galicia, unha ferramenta exclusivamente dedicada á promoción de solo residencial e vivenda pública, e que asumirá a construción de 2.350 vivendas de promoción pública que deberán estar rematadas antes do fin desta lexislatura.
Estas vivendas construídas pola sociedade serán cualificadas como de promoción pública, co mesmo réxime que as executadas polo Instituto Galego da Vivenda e Solo.
Medidas lexislativas e fiscais excepcionais
M. Allegue lembrou a activación de novas medidas excepcionais ata 2028, así como modificacións de carácter normativo, lexislativo e fiscal, para axilizar trámites para a construción de vivenda, incentivar a rehabilitación e a posta no mercado de vivendas.
Remarcou que se introduciron dúas importantes modificacións na Lei de Vivenda: a cualificación indefinida e permanente do réxime de protección das VPP e das VPA que se constrúan nun solo desenvolvido por promotor público; e a regulación dos aloxamentos compartidos para facilitar a emancipación dos mozos.
Tamén puxo en valor a consideración das VPP como obra de interese xeral, o que se traduce en redución dos tempos administrativos; a redución de trabas para conversión de baixos en vivenda; ou a activación dun réxime para favorecer o remate de edificacións non acabadas.
No eido fiscal, a efectos de bonificación tributaria equipárase ao concepto vivenda aquel local comercial adquirido para uso residencial; ou promóvese a dedución do 15% na cota autonómica do IRPF dos gastos de adecuación de inmoble baleiro para destinalo a alugamento.
Ademais lembrou que tamén se actualizaron os límites do IPREM para que un maior número de familias poidan acceder ás vivendas protexidas.
