Rueda destaca a oportunidade que supón o turismo náutico para consolidar Galicia coma un destino atractivo durante todo o ano
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Salienta que a comunidade pechou 2024 con cifra récord de turistas ao superar os 8,2 millóns de visitantes, fronte "aos cinco millóns de 2019"
- O turismo internacional xa representa o 30% do total e medra o gasto realizado
- Aposta por un turismo ordenado nunha terra "onde non sobra ninguén"
- O futuro Centro de Recepción de Peregrinos Náuticos busca revitalizar a Ruta Traslatio que permite peregrinar a Compostela por mar, augas fluviais e terra
Estas imágenes pertenecen a Página Oficial de la Xunta de Galicia
Vilagarcía de Arousa (Pontevedra), 1 de febreiro de 2025
O presidente da Xunta, Alfonso Rueda, destacou hoxe "o potencial" do turismo náutico en Galicia e asegurou que é unha oportunidade para que a comunidade se consolide coma un destino atractivo "ao longo de todo o ano".
Durante a presentación do futuro Centro de Recepción de Peregrinos Náuticos de Vilagarcía de Arousa, acompañado polo conselleiro do Mar, Alfonso Villares, o titular autonómico resaltou que Galicia pechou 2024 con novo récord de visitantes. Tal e como explicou, máis de 8,2 millóns de viaxeiros se aloxaron o pasado ano nalgún establecemento da comunidade, moi por riba "dos cinco millóns rexistrados no 2019". Entre eles cómpre destacar a case medio millón de peregrinos.
Ademais, segundo os datos do Instituto Nacional de Estatística, os visitantes procedentes doutros países xa representan o 30% do total de viaxeiros que chegan á comunidade. De feito, Galicia rexistrou o maior número de pernoctacións de turistas estranxeiros da súa historia -máis de catro millóns en todo o ano- e tamén aumentou o gasto medio realizado: 170 euros, o que supón un 14,3% máis que no 2023. Por países de orixe, o maior incremento produciuse entre os turistas estadounidenses (+22,1%), seguidos dos italianos (+11,8) e os alemáns (+5%).
O sector turístico supón un dos motores da economía galega -este eido obtivo uns ingresos nominais totais de 432 millóns de euros en 2024, un 6,7% máis que no 2023- e da xeración de emprego. Por iso, o presidente reafirmou o compromiso da Xunta con seguir promovendo a chegada de viaxeiros dun xeito ordenado. "Aquí non nos sobra ninguén. Queremos desestacionalizar o turismo e ofrecer alternativas ao que xa coñecen. E o turismo náutico é bo exemplo", indicou.
Ruta Traslatio
O presidente do Goberno autonómico destacou que a posta en marcha do futuro Centro de Recepción de Turistas Náuticos no peirao de Vilagarcía de Arousa vai supoñer un impulso para a Ruta Traslatio, a única do Camiño de Santiago que permite peregrinar por mar, augas fluviais e por terra.
A Xunta destina máis de 790.000 € ás obras para transformar a antiga estación marítima de pasaxeiros nun centro de recepción de turistas náuticos e promover as actividades deportivas vencelladas ao mar.
