A intensidade da gripe en Galicia mantense nun nivel baixo con tendencia crecente
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O último informe de actividade gripal elaborado pola Consellería de Sanidade indica que a taxa de consultas por gripe aumentou un 107 % na última semana
- Pola contra, a dispensación de antigripais e probas de antíxenos nas farmacias sentinela minguou nos últimos sete días
- Na segunda semana do ano ingresaron no hospital 150 persoas con gripe confirmada
- A Dirección Xeral de Saúde Pública recomenda o emprego da máscara en pacientes con síntomas respiratorios e os profesionais que os atenden, así como para determinados grupos de risco ou dispositivos asistenciais
Santiago de Compostela, 16 de xaneiro de 2025
A Consellería de Sanidade publica, na súa páxina web o informe de actividade das infeccións respiratorias agudas correspondente á segunda semana do ano que determina que a intensidade da gripe continúa en nivel baixo aínda que con tendencia crecente.
Segundo os datos, a taxa de consultas por gripe nos servizos de atención primaria aumentaron un 107 % con respecto da semana previa e fica en 73,4 consultas por 100.000 habitantes. O incremento obsérvase en todos os grupos de idade, agás no de 0 a 4 anos. O grupo coa maior taxa de consultas foi o de 20 a 59 anos. Por áreas sanitarias, a taxa de consultas foi superior en todas elas, destacando a área sanitaria de Ourense Verín e O Barco de Valdeorras.
O Plan sanitario de inverno da Xunta desta temporada recolle de forma innovadora a vixilancia epidemiolóxica a través das achegas dunha rede de farmacias sentinela. Desta forma, os datos remitidos á Dirección Xeral de Saúde Pública reflicten que as taxas de dispensación de antigripais e probas de antíxenos minguaron respecto da primeira semana do ano 2025.
En canto aos ingresos hospitalarios, na semana do 6 ao 13 de xaneiro de 2025 ingresaron 150 persoas con gripe confirmada, isto é un 27 % máis que a semana anterior.
No que vai de temporada da gripe notificáronse 481 ingresos, a maioría deles con virus tipo A.
A Dirección Xeral de Saúde Pública recomenda o emprego da máscara aos pacientes con síntomas respiratorios e aos profesionais que os atenden, así como en determinados grupos de risco ou dispositivos asistenciais como poden ser as urxencias hospitalarias.
O informe de actividade das infeccións respiratorias agudas indica que a razón de casos por médico de covid-19 mantívose estable mentres que a taxa de consultas aumentou un 18,4 %.
Pola súa banda, no que atinxe ao Virus Respiratorio Sincitial (VRS) a taxa de ingresos no conxunto da poboación foi de 1,6 ingresos por 100.000 habitantes, un dato inferior ao da semana pasada (3,8 ingresos por 100.000 habitantes).
No seguinte enlace pódese acceder ao último informe de actividade das infeccións respiratorias agudas en Galicia:
https://www.sergas.gal/Saude-publica/Informes-de-vixilancia-das-infeccions-respiratorias-agudas-IRAs
