A Xunta consegue desbloquear os proxectos para mitigar o problema da falta de aparcamentos en Lugo

Lugo, 8 de xaneiro de 2025

O delegado territorial da Xunta en Lugo, Javier Arias, mantivo esta mañá unha reunión coa alcaldesa de Lugo e persoal técnico das dúas administracións, convocada polo representante autonómico co ánimo de desbloquear proxectos que se atopan "en distintas fases de execución" e cos que se pretende "favorecer unha mobilidade sostible e mitigar o problema da falta de aparcamentos na cidade".

Na xuntanza analizouse a situación de tres proxectos en concreto: as posibilidades para a creación dun aparcamento na avenida de Fontiñas e a apertura dos aparcamentos dos institutos e do construído pola Xunta na Avenida de Breogán.

No tocante á construción dun aparcamento en Fontiñas, Arias reiteroulle á alcaldesa a "plena disposición" do Goberno galego a colaborar neste proxecto, se ben trasladoulle que a proposta inicial presentada polo Concello -que plantexaba ubicar o aparcamento nunha parcela que linda coas rúas Rof Codina, Illa da Toxa e Xoan Rico Pérez- "non resolve en absoluto os problemas dos veciños e veciñas de Fontiñas e demais usuarios desa vía". A rexedora rectificou da súa proposta e na reunión plantexáronse xa outras posibles localizacións na contorna da propia avenida. "A Xunta acometará integramente a construción deste aparcamento e por iso analizaremos a fondo as distintas propostas e falaremos tamén cos veciños para ver cal é a alternativa que ofrece a resposta máis eficaz ás súas necesidades", explicou o delegado.

Nun segundo punto, abordouse a apertura ao público dos aparcamentos dos institutos, en horarios compatibles coa actividade lectiva. A Xunta abrirá en primeiro lugar o aparcadoiro do IES Nosa Señora dos Ollos Grandes, un trámite para o que é necesario que se convoque previamente a Xunta local de seguridade co fin de asinar un convenio entre as Administracións que permita definir as responsabilidades e competencias que asume cada parte en cuestións como, por exemplo, a retirada de vehículos dentro do espazo. "A alcaldesa comprometeuse a convocar canto antes a xunta local de seguridade, así que agardamos que sexa así para poder abrir o aparcamento do instituto á maior brevidade posible, coa seguridade xurídica necesaria", dixo Arias.

Lembrou ademais a vontade do Goberno galego de abrir tamén o aparcamento do IES Lucus Augusti pero explicou que neste caso haberá que agardar a que as obras de rehabilitación integral que a Consellería de Educación, Ciencia, Universidades e Formación Profesional está a executar no centro, cun investimento de 3,3 millóns de euros, permitan usar o espazo do aparcamento e facelo en condicións de seguridade.

Por último, a xuntanza de hoxe serviu tamén para avanzar na apertura do aparcamento disuasorio construído pola Xunta na Avenida de Breogán, e que suporá poñer a disposición da cidade 148 novas prazas. O delegado territorial conseguiu o compromiso da alcaldesa de que se axilizará a concesión da autorización necesaria para que a Xunta poida actuar dentro do dominio público municipal e realizar así as obras que dean solución aos problemas de drenaxe de auga que xa existían previamente na contorna do aparcadoiro, afectando principalmente na rúa Monte Pena Rubia.

Arias amosou a satisfacción por avanzar neste asunto e lembrou que a Xunta leva "uns dous meses" agardando pola licenza para poder realizar os traballos, "unha obra menor que a Xunta decidiu asumir co fin de axilizar a apertura do aparcamento, malia ser un problema de competencia municipal que existía con anterioridade á súa construción e que ademais está fóra da zona na que se actuou". Así mesmo, instou á alcaldesa a realizar unha actuación integral noutras zonas máis altas do barrio para mellorar definitivamente os problemas que se poñen de manifesto cando se rexistran choivas intensas.

O delegado territorial confía en que a reunión sirva realmente para "avanzar por fin nestes tres proxectos dentro da lealdade e a colaboración institucional, porque entendemos que urxe sacalos adiante para avanzar nun modelo de mobilidade sostible e dotar á cidade de necesarias prazas de aparcamento para o beneficio do conxunto dos veciños".