O deporte xerou case o 1% do PIB galego en 2022
Estas imágenes pertenecen a Página Oficial de la Xunta de Galicia
- Segundo os resultados da Conta Satélite do Deporte de Galicia, feita pública hoxe polo Instituto Galego de Estatística
- Galicia é pioneira no conxunto do Estado en contar cunha operación estatística destas características
Santiago de Compostela, 27 de decembro de 2024
O valor engadido bruto xerado polo sector do deporte en Galicia no ano 2022 ascendeu a máis de 620 millóns de euros, segundo a Conta Satélite do Deporte de Galicia feita hoxe pública polo Instituto Galego de Estatística (IGE). Este dato representa o 0,9 % do Produto Interior Bruto xerado na Comunidade autónoma nese exercicio.
En termos de emprego, e segundo o mesmo estudo, o sector deportivo é responsable directo de 16.436 postos de traballo, o que representa o 1,4 % do total da economía galega. A meirande parte é asalariado, cunha remuneración próxima aos 515 millóns de euros.
A Conta Satélite do Deporte é unha actividade estatística de síntese cuxo obxectivo principal é proporcionar un sistema de medición económica do sector do deporte que permita valorar a súa importancia no conxunto da economía galega. Este proxecto xurdiu a iniciativa da Consellería de Presidencia, Xustiza e Deportes, que solicitou ao IGE a cuantificación da dimensión económica do sector.
Disponse así de información da conta de produción, explotación e emprego. Tómase como referencia a Clasificación de Vilnius, restrinxíndoa aos denominados produtos e servizos característicos: aqueles que non existirían se non fose polo deporte. Na metodoloxía desta actividade detállanse os códigos CNAE-09 incluídos na definición do sector e o procedemento de estimación en cada caso.
Conta Satélite pioneira en España
Galicia é pioneira no conxunto do Estado en contar cunha Conta Satélite do Deporte, xa que esta operación estatística non existe en ningunha outra comunidade autónoma nin na Administración xeral do Estado. Esta última está a traballar nunha conta satélite propia para o conxunto do territorio español.
A comunidade galega segue así a estela comunitaria, na que as distintas institucións europeas animan os estados membros a avanzar no desenvolvemento de contas satélite do deporte que reflictan o impacto económico deste sector. A propia Unión Europea avanza tamén cara a unha conta satélite do deporte propia, cuxa publicación está prevista para 2025 no marco do Plan de Traballo da Unión Europea para o Deporte.
- Etiquetas:
- C. de Presidencia, Xustiza e Deportes
Documentos descargables
- No hay ficheros adjuntos