A Xunta adxudica as obras de humanización de varias prazas do concello de Coristanco
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- A actuación, impulsada ao abeiro do Plan Hurbe da Xunta, adxudicouse por importe de 267.565€
- Os traballos permitirán acondicionar as prazas de San Antonio e do Cruceiro, na parroquia de San Lourenzo da Agualada, e a rúa e a praza de San Roque, na parroquia de Santa María de Traba
Estas imágenes pertenecen a Página Oficial de la Xunta de Galicia
Santiago de Compostela, 14 de decembro de 2024
A Consellería de Vivenda e Planificación de Infraestruturas adxudicou á empresa Novavial S.L. as obras de humanización de varias prazas de Coristanco, por un prezo de 267.565€.
As actuacións previstas, que se enmarcan no Plan Hurbe da Xunta, permitirán humanizar as prazas de San Antonio e do Cruceiro, no lugar de Agualada, e a rúa e praza de San Roque, na parroquia de Santa María de Traba. Nelas, levaranse a cabo diversas intervencións para unificar os distintos espazos e mellorar a accesibilidade, ademais de substituír elementos danados.
En concreto, as obras na praza de San Antonio céntranse en unificar a praza. Para iso, eliminarase o paso existente que divide a zona da fonte coa Igrexa e utilizarase o mesmo pavimento de pedra existente no resto da praza, para darlle un acabado uniforme a todo o conxunto. Substituiranse así mesmo as baldosas danadas e recolocaranse as árbores existentes no lado da fonte, para ofrecer un mellor acceso á praza.
No que atinxe á praza do Cruceiro, construirase unha plataforma única para integrar o colexio coa zona de xogos infantís, creando unha zona preferentemente peonil e facilitando a accesibilidade da zona, coa desaparición das estreitas beirarrúas e a creación dun espazo máis amplo. O acceso rodado será nunha única dirección.
Así mesmo, prevese a plantación de árbores, a colocación de farois ao longo da devandita plataforma e a creación dunha zona de aparcamento. Tamén se colocará un valado sobre o muro da zona de xogos e a obra completarase coa retirada e soterramento do cableado e a recollida das augas pluviais ao final da rúa.
Por outra banda, na rúa e na praza de San Roque, a intervención persegue dar un mellor acceso á praza desde o centro do pobo, para o que se ampliarán as beirarrúas no inicio da rúa de actuación. Prevese que o sentido de circulación de vehículos na praza sexa único.
Ademais, dotarase de iluminación á zona, unificaranse os paseos e recolocaranse bancos, farois e papeleiras existentes. Tamén se regularizará o acceso á área de xogos e delimitaranse a zona de aparcamentos ao redor da praza e un carril bici no lado oposto aos aparcamentos.
Os traballos fináncianse a través do convenio asinado entre a Xunta e o Concello ao abeiro do Plan Hurbe, impulsado polo Goberno galego co fin de axudar ás administracións locais a financiar intervencións de mellora de equipamentos das contornas urbanas e recuperación do espazo público. O Goberno galego cofinancia nun 70% as intervencións, contratará e executará as obras. Pola súa banda, o Concello de Coristanco achegará o 30% restante.
