Galicia lidera un ano máis as candidaturas á bandeira Sendeiro Azul para 2025, con 55 rutas aspirantes
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Marisol Díaz salienta a calidade das propostas e a relevancia do galardón para atraer visitantes á Comunidade e promover un uso público e sostible dos espazos naturais
- Destaca que na listaxe galega hai 8 sendas que optan por primeira vez ao galardón
Estas imágenes pertenecen a Página Oficial de la Xunta de Galicia
Ourense, 13 de decembro de 2024
Galicia volve liderar as candidaturas á bandeira Sendeiro Azul 2025, un distintivo que a Asociación de educación ambiental e do consumidor (Adeac) concede desde hai varios anos para recoñecer o papel das rutas e camiños como un recurso valioso para gozar da natureza, realizar actividades deportivas e de ocio ao aire libre e axudar a interpretar ambientalmente a contorna.
Durante a súa participación en Ourense na reunión do xurado responsable deste programa, que estivo presidido polo presidente de Adeac, José Palacios, e se celebrou no marco do V Congreso Internacional de Turismo e Deporte, a directora xeral de Patrimonio Natural, Marisol Díaz, salientou que Galicia presenta 55 candidaturas a sendeiros azuis, das cales un total de 8 optan a este recoñecemento por primeira vez.
Así mesmo, explicou que a provincia de Ourense aspira a revalidar o galardón que obtivo este ano por primeira vez xa que a Dirección Xeral de Patrimonio Natural volve presentar a candidatura a sendeiro azul da ruta da Aceveda, no Parque Natural do Invernadeiro, en Vilariño de Conso e que pertence integramente á Xunta.
Tras a reunión desta mañá, na que os membros do xurado analizaron as propostas recibidas no conxunto do país, o seguinte obxectivo para Galicia, segundo explicou a directora xeral, é revalidar o resultado da pasada edición, cando se converteu na comunidade co maior número de distintivos deste tipo: 49 das 128 bandeiras concedidas no conxunto do país e unha rede de itinerarios azuis que suma 319,37 quilómetros.
Neste sentido, Marisol Díaz salientou a calidade de todas as propostas e a relevancia deste galardón para atraer visitantes á Comunidade e promover á vez un "uso público e sostible dos espazos naturais", promovendo o seu coñecemento a través das múltiples rutas que axudan a percorrelos e coñecer a súa beleza e rica biodiversidade.
Cómpre lembrar que o programa Sendeiro Azul premia e recoñece cada ano a recuperación e posta en valor de rutas, sendas e itinerarios peonís mediante a súa transformación en contornas respectuosas, resilientes e sostibles.
Nesta liña, entre os principais obxectivos da iniciativa inclúense o fomento da conectividade ecolóxica e a restauración ambiental; a contribución coa análise de fontes cartográficas e de datos á planificación e xestión de zonas naturais; o fortalecemento da coordinación entre as administracións con competencias nestes espazos; a integración transversal de aspectos económicos, ambientais e sociais, e a mellora do coñecemento e sensibilización ambiental.
Ademais, realízase unha revisión periódica dos seguintes aspectos: características das sendas e trazados; estado da información, sinalización e infraestruturas; conservación e xestión do patrimonio natural e cultural, e uso público e desfrute.
