A Xunta amplía as zonas demarcadas pola presenza da flavescencia dourada da vide
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O Diario Oficial de Galicia publica hoxe a resolución na que se recollen as parroquias afectadas por esta ampliación e as novas medidas de erradicación e control
- Os titulares das parcelas nas que se detecte a presenza de plantas infestadas ou insectos vectores deberán eliminar as plantas infestadas o antes posible e aplicar un tratamento insecticida autorizado en toda a parcela
- En todas as zonas demarcadas obrigaranse a realizar tratamentos fitosanitarios nos períodos de voo do vector
Estas imágenes pertenecen a Página Oficial de la Xunta de Galicia
Santiago de Compostela, 27 de novembro de 2024
O Diario Oficial de Galicia publica hoxe unha resolución na que se recolle unha ampliación dos concellos con presenza da praga de corentena denominada flavescencia dourada da vide, establecendo a zona demarcada e adoptando medidas urxentes para a súa erradicación e control en Galicia. Esta actualización inclúe dous novos concellos onde se declaran parcelas infestadas na provincia de Ourense, A Arnoia e Ribadavia. Ademais, a zona tampón amplíase na provincia ourensá a varias parroquias dos concellos de Castrelo de Miño, Melón, Cartelle e Ramirás.
A praga denominada flavescencia dourada da vide é provocada polo organismo denominado Grapevine flavescence dorée phytoplasma e transmitido por un insecto vector (Scaphoideus titanus). A nova zona demarcada está formada pola zona infestada -parcelas onde se confirma a súa presenza- e unha zona tampón arredor desta.
O 2 de febreiro de 2023 publicouse a resolución que declaraba a presenza de flavescencia dourada en Galicia, estableceu a zona demarcada e as medidas urxentes para a súa erradicación e control. O 17 de novembro de 2023 ampliáronse as zonas demarcadas e establecéronse novas medidas de erradicación e control. Durante as prospeccións realizadas ao longo do 2024 producíronse novas deteccións deste organismo nocivo, o que fai preciso ampliar a zona demarcada e manter as medidas xa establecidas.
As parcelas infestadas a día de hoxe atópanse nos concellos da Cañiza, Arbo, As Neves, Crecente, O Rosal, Oia e Tomiño, na provincia de Pontevedra; e nos concellos da Arnoia, Cortegada, Gomesende, Padrenda, Pontedeva, Quintela de Leirado e Ribadavia, en Ourense. Ademais, a zona tampón tamén se estende a varias parroquias dos concellos de Salceda de Caselas, Salvaterra de Miño e Tui, na provincia de Pontevedra; e varias parroquias de Castrelo de Miño, Melón, Cartelle e Ramirás, en Ourense.
Medidas obrigatorias nas zonas demarcadas
Dentro da zona infestada, os titulares das parcelas vitivinícolas nas que se detecte a presenza de plantas infestadas ou insectos vectores deberán aplicar o antes posible un tratamento insecticida autorizado a todas as plantas. As plantas infestadas e todas as sintomáticas das parcelas deberán ser arrincadas e destruídas baixo control oficial o antes posible. O máis recomendable é que esta destrución se realice in situ e, se non é posible, realizarase nun rodal próximo, por incineración ou por algún outro método autorizado.
Ademais, no caso de que a parcela afectada teña máis dun 20 % de plantas sintomáticas, estudarase a posibilidade de eliminar e destruír todas as plantas da parcela. Se a detección se realiza nunha parcela abandonada deberá arrincarse toda a parcela.
No relativo a viveiros e outros operadores profesionais dentro das zonas infestadas, en caso de detectar un positivo, este será eliminado e quedará inmobilizado de xeito cautelar o material de vide (Vitis spp.) ata a súa inspección. Na actualidade non hai ningún viveiro ou operador profesional afectado na zona demarcada.
Por outra banda, será obrigatorio en toda a zona demarcada que os titulares das parcelas vitícolas e os operadores profesionais realicen tratamentos insecticidas con produtos fitosanitarios autorizados nos períodos de voo do vector, que se produce habitualmente nos meses de verán, e que serán publicados na web da Consellería. Ademais, os titulares deberán vixiar a presencia de flavescencia dourada nas súas parcelas ou instalacións e comunicar ás autoridades competentes calquera sospeita ou confirmación da presenza da praga.
Así mesmo, tamén cómpre arrincar e destruír todas as plantacións abandonadas das zonas demarcadas, así como eliminar as plantas silvestres do xénero Vitis spp. e aquelas que poidan ser portadoras da enfermidade, entre outras medidas preventivas.
