López Campos avanza no Pacto pola lingua cunha xuntanza co Consello da Cultura Galega

Santiago de Compostela, 8 de novembro de 2024

O conselleiro de Cultura, Lingua e Xuventude, José López Campos, reuniuse hoxe coa presidenta do Consello da Cultura Galega, Rosario Álvarez, no marco das xuntanzas que está a manter para avanzar no Pacto pola Lingua, un proceso, apuntou o representante da Xunta, "no que consideramos esencial facer partícipes a distintas institucións relevantes na sociedade que poden aportar achegas de grande interese a esta folla de ruta para impulsar o galego".

Así, a reunión dálle continuidade aos primeiros encontros que xa se produciron cos grupos parlamentarios, e que se volverán retomar nas vindeiras semanas, encamiñados a acadar o consenso sobre as liñas de actuación que permitan reforzar a presenza da lingua en todos os eidos. Neste senso, tal e como lembrou López Campos, ao Consello da Cultura Galega seguiranlle conversas coa Real Academia Galega e con outras entidades como a Administración xeral, a Federación Galega de Municipios e Provincias e as universidades.

Con estes movementos, indicou o responsable autonómico de Lingua, "estamos ante un momento único para unir forzas e traballar en conxunto polo prestixio da nosa lingua, demostrando o compromiso de todos e todas polo noso maior tesouro". Un traballo que, recordou, parte dun documento que a Consellería de Cultura, Lingua e Xuventude xa propuxo ás formacións políticas na toma de contacto inicial e que tamén lle presentou á presidenta do Consello da Cultura Galega tendendo unha ponte, dixo, para "enriquecelo con novas propostas que, a bo seguro, van ir en beneficio do galego e da sociedade".

Deste xeito, desde a Xunta deseñáronse unha serie de liñas clave que teñen por obxectivo chegar a un Pacto pola Lingua, sobre as que se irán artellando novas accións ao longo dos próximos meses. Así, o punto de partida contempla: a renovación do Plan xeral de normalización da lingua galega coa creación de comisións de traballo antes de final de ano formadas por persoas de recoñecido prestixio; a posta en marcha dun plan de 50 medidas para impulsar o uso do galego en diversos eidos; o incremento dun 30% da partida destinada a accións de dinamización da lingua nos orzamentos de 2025; situar a CRTVG como catalizadora da lingua, favorecendo produtos en galego, e seguir as recomendacións da Carta europea das linguas rexionais ou minoritarias como referencia.

As primeiras medidas

Desde principios de outubro, a Consellería de Cultura, Lingua e Xuventude ten en marcha unha campaña que, baixo o lema Saca a lingua que levas dentro, convida a facer uso do galego máis alá do alto nivel de coñecemento e competencias que do idioma, segundo os últimos datos do Instituto Galego de Estatística, ten a maioría da poboación. Esta é só unha das propostas que compoñen un extenso plan de medidas a prol da concienciación, dinamización e impulso da lingua.

Os seguintes pasos, sobre os que xa se leva traballando hai tempo e que se desenvolverán nos vindeiros meses, abranguen accións centradas no eido dixital, outras enfocadas nas persoas chegadas do exterior e ao fenómeno do neofalantismo, así como iniciativas dirixidas á mocidade ou a reforzar a presenza do galego en diferentes sectores profesionais e diversos ámbitos da sociedade.

Neste senso, cómpre sinalar a posta en marcha o ano que vén de máis de 100 cursos de cultura e lingua galegas para persoas non nacidas en Galicia, ademais de grupos de voluntariado lingüístico para organizar conversas e propostas de traballo colaborativo coas asociacións de distintas comunidades asentadas en territorio galego. A isto, engádense outros cursos centrados en distintos ámbitos profesionais, como o sanitario, e propostas como actividades para incentivar a lingua na escola.

Pola súa parte, as persoas que deciden falar galego cando a súa lingua nai foi outra teñen á súa disposición o portal neofalantes.gal, onde, máis alá de atopar un punto informativo, tamén poden interactuar a modo de rede social para dar testemuños e compartir experiencias sobre o proceso. Ademais, no eido dixital tamén destaca o Proxecto Nós, unha das propostas máis ambiciosas a prol do galego que avanza para situalo nun medio esencial hoxe en día, de maneira que estea presente en todas as plataformas tecnolóxicas.

Ano Castelao no 2025

Durante a reunión, o conselleiro de Cultura, Lingua e Xuventude e a presidenta do Consello da Cultura Galega tamén tiveron oportunidade de dialogar sobre a proposta de declarar no 2025 o Ano Castelao, que onte anunciaba López Campos no Parlamento.

A iniciativa, tal e como apuntou o representante da Xunta, sitúase tamén no marco de actuacións para incentivar e darlle valor á lingua "uníndonos ao redor dunha figura clave para a nosa identidade", resaltou. Así, engadiu, "ademais de conmemorar o 75 aniversario do nacemento do intelectual, temos por diante un ano de oportunidades para a nosa lingua, a nosa historia e nosa cultura".