A Xunta destina 639.000 euros a impulsar a actividade das tres fundacións públicas galegas de investigación biomédica
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O Consello da Xunta autorizou hoxe a sinatura de tres convenios de colaboración destinados a facilitar a transferencia de resultados da investigación á práctica sanitaria
- Os Institutos de Investigación sanitaria integran a máis de 2.300 investigadores distribuídos en 187 grupos de investigación, a maior parte deles profesionais do Servizo Galego de Saúde e das universidades da nosa comunidade
Santiago de Compostela, 28 de outubro de 2024
A Xunta vai destinar 639.000 euros a impulsar a actividade das tres fundacións públicas galegas de investigación biomédica co obxectivo de facilitar a aplicación na práctica sanitaria dos coñecementos. O obxectivo é fomentar a transferencia dos resultados da investigación sanitaria en beneficio da saúde da cidadanía.
O Consello da Xunta aprobou hoxe a sinatura de tres convenios de colaboración entre a Consellería de Sanidade, a través da Axencia Galega para a Xestión do Coñecemento en Saúde, e as tres fundacións públicas galegas de Investigación Biomédica, a da Coruña (FINIBIC); a de Santiago de Compostela (FIDIS); e a de Galicia Sur (FPGIBGS), destinados ao desenvolvemento do Programa INTRES de impulso da investigación traslacional de excelencia en saúde de Galicia.
Os tres convenios de colaboración, que comprenden as actuacións do período 2024-2026, teñen por obxecto a realización de actividades dirixidas a implantar un núcleo de excelencia que fomente a colaboración e o intercambio de coñecemento, así como o desenvolvemento e a innovación tecnolóxica necesarios para incrementar a competitividade e a mellora da saúde das galegas e galegos.
Melloras reais na atención
Entre as liñas de actuación máis destacadas destes acordos están o incremento da cultura científica, tecnolóxica e innovadora dos principais axentes do ecosistema galego de I+D en Saúde, así como incrementar a difusión dos resultados da investigación.
A transferencia de resultados é un obxectivo prioritario da investigación sanitaria galega, para conseguir que os avances científicos se plasmen en melloras reais na atención sanitaria e, con iso, na saúde da poboación.
A través da implementación de novos coñecementos e tecnoloxías, pódense optimizar os tratamentos e mellorar a calidade asistencial. Con iso preténdese pechar a fenda entre os descubrimentos científicos e a súa aplicación práctica, para que se consiga realmente impactar nos pacientes ou nos sistemas de saúde.
Xunto ao anterior, preténdese mellorar a educación científico-técnica da sociedade en todos os niveis, colaborar na profesionalización da divulgación científica e apoiar o establecemento de sinerxías e o aproveitamento de recursos dos axentes do sistema de divulgación do coñecemento en saúde.
O Programa INTRES, obxecto dos convenios, está en concordancia coa Estratexia do Servizo Galego de Saúde 2030, que aposta polo impulso da xestión do coñecemento e a investigación a través de innovacións organizacionais con liderado en investigación, ademais de atracción de financiamento para investigación e aproveitamento de coñecementos particulares destinados á mellora común do sistema.
Asesoramento e apoio aos profesionais
As Fundacións de investigación biomédica ou sanitaria (que xestionan a investigación dos centros e institutos de investigación sanitaria de Galicia) teñen por obxectivo impulsar a investigación, a docencia, o desenvolvemento científico-tecnolóxico e a innovación no ámbito sanitario e en Ciencias da Saúde, servindo de apoio, asesoramento e xestión aos profesionais e investigadores das sete áreas sanitarias.
Os Institutos de Investigación sanitaria xestionados por estas Fundacións agrupan a máis de 2.300 investigadores distribuídos en 187 grupos de investigación distintos, a maior parte deles profesionais do Sergas e das universidades que levan a cabo estudos de investigación no ámbito biomédico, ademais dos preto de 600 profesionais que prestan os seus servizos directamente nestas fundacións.
Estes grupos de investigación abordan nos seus estudos distintas áreas de investigación como oncoloxía, xenética, microbioloxía, endocrinoloxía, nutrición, metabolismo, enfermidades cardiovasculares, neurociencias, enfermidades inflamatorias e infecciosas ou vacinas, entre outras.
O seu labor é fundamental, non só no desenvolvemento científico, senón na mellora da asistencia sanitaria á cidadanía, xa que un centro sanitario que investiga é un centro que presta unha mellor asistencia, ao manter unha constante actualización das súas capacidades e do coñecemento dos seus profesionais.
