A Xunta inicia os trámites para constituír e regular o Foro do Litoral como máximo órgano de consulta e participación para a ordenación costeira de Galicia
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O decreto polo que se establecerá a composición e o funcionamento interno deste organismo de nova creación se someterá a consulta pública previa a partir de mañá
- Os seus obxectivos serán garantir o cumprimento dos principios inspiradores da Lei de ordenación e xestión integrada do litoral de Galicia e a participación eficaz e suficiente dos sectores sociais e económicos implicados na materia
- Con este paso, a Xunta segue avanzando no desenvolvemento da Loxilga á espera de que o Goberno central concrete e impulse a transferencia efectiva á Comunidade das funcións, servizos e medios necesarios para que poida asumir a xestión da costa
Estas imágenes pertenecen a Página Oficial de la Xunta de Galicia
Santiago de Compostela, 21 de outubro de 2024
A Xunta inicia os trámites necesarios para constituír e regular o futuro Foro do Litoral de Galicia, un instrumento de nova creación, chamado a actuar como máximo órgano colexiado de participación, consulta e asesoramento en materia de ordenación da franxa costeira na Comunidade.
A tales efectos, o decreto polo que se regulará a composición e funcionamento interno do futuro órgano someterase a partir de mañá e durante o prazo dun mes a unha consulta pública previa co obxectivo de recompilar suxestións e ideas sobre a mellor forma de organizalo antes de iniciar a redacción do documento.
A creación do Foro do Litoral prevese na Lei de ordenación e xestión integrada do litoral de Galicia (Loxilga), aprobada en xullo de 2023 e cuxo desenvolvemento estivo meses parado polo recurso do Goberno central. Así e unha vez recibido o aval do Constitucional a través dunha sentenza emitida o pasado abril, o obxectivo da Xunta é impulsar todos aqueles instrumentos e medidas que contribúan ao seu desenvolvemento práctico e a que poida asumir a xestión da súa costa o antes posible, de forma práctica e directa.
Como primeiro paso, o 9 de outubro constituíuse a Comisión interdepartamental de coordinación do litoral que será, a partir de agora, a encargada de supervisar a elaboración, aplicación e seguimento dos diferentes instrumentos de ordenación nos que se apoia a lei para garantir o cumprimento do seu principal obxectivo: xestionar de forma integrada e en clave galega as actividades humanas no litoral para garantir o aproveitamento sostible dos seus recursos e a conservación dos ecosistemas costeiros.
Precisamente, o impulso do Foro do Litoral foi a primeira encomenda que recibiu esta comisión, que acordou así mesmo empezar a elaborar as Directrices de ordenación do litoral como marco xeral de referencia para a elaboración dos restantes instrumentos.
O obxectivo é construír un espazo participativo e de consulta no que estean presentes, xunto á Administración autonómica, as universidades galegas, organismos científicos, organizacións representativas dos principais sectores produtivos galegos, entidades ambientais e aquelas cuxo obxectivo sexa a defensa e protección do patrimonio cultural.
Con tal fin, as entidades que integren o Foro do Litoral deberán velar polo cumprimento dos principios xerais de xestión integrada da costa que inspiran a Loxilga e, ademais, garantir a participación suficiente e eficaz dos sectores socioeconómicos nas estratexias procedementos e proxectos relacionados coa ordenación costeira. Para conseguilo, é clave establecer unha organización administrativa do litoral que garanta a súa xestión integrada a través de técnicas adecuadas e efectivas de coordinación, colaboración, cooperación e participación, de aí o importante papel que se lle reserva a este órgano.
De feito, un dos elementos diferenciais da norma autonómica é que nela se establece que o deseño, a aprobación e a xestión dos instrumentos de ordenación do litoral, así como a toma de decisións sobre os usos e actividades que acolla este territorio, se basearán no enfoque ecosistémico e na xestión integrada, respectando os principios de desenvolvemento sustentable, prevención, participación e uso das mellores e máis recentes evidencias científicas dispoñibles así como dos coñecementos tradicionais.
Pioneira en regular a costa en toda a súa extensión
Coa aprobación da Lei de ordenación e xestión integrada do litoral, Galicia converteuse na primeira comunidade española en regular a través dunha normativa propia e integral a franxa costeira en toda a súa extensión, é dicir, tanto mar dentro como terra dentro. De feito, a través dela a Xunta xestionará 1.600.000 hectáreas terrestres e marítimas.
Partindo da consideración da costa desde unha perspectiva social, ambiental e económica, a lei establece tres grandes áreas diferenciadas en función do seu estado de conservación e necesidades particulares, ao tempo que concreta os usos permitidos e prohibidos no litoral. A norma delimita así mesmo as actuacións e usos estratéxicos que permitirán a ocupación e asentamento da costa a través das autorizacións pertinentes.
En definitiva, con ela dáse un paso decisivo para que Galicia poida asumir as competencias plenas e efectivas que lle atribúe o Estatuto sobre a ordenación e a xestión do litoral, un proceso iniciado hai case 40 anos e pendente agora de impulsar o procedemento efectivo para o traspaso das funcións, servizos e medios materiais e persoais dos que actualmente dispón o Goberno central para xestionar a costa galega.
