A Xunta e a Universidade de Santiago de Compostela facilitarán a incorporación dos profesionais sanitarios á carreira docente e investigadora

Santiago de Compostela, 2 de outubro de 2024

A Xunta de Galicia e a Universidade de Santiago de Compostela (USC) facilitarán a incorporación dos profesionais sanitarios á carreira docente e investigadora. A tal efecto, o conselleiro de Sanidade, Antonio Gómez Caamaño, e o reitor da USC, Antonio López Díaz, asinaron hoxe, no Colexio de San Xerome, un protocolo de colaboración entre ambas as institucións.

Con esta iniciativa, tanto a USC como a Consellería de Sanidade apostan por favorecer que o persoal asistencial poida entrar en programas de doutoramento e completar tarefas investigadoras, ademais de colaborar en labores docentes, para ir facendo un currículo que lles permita superar con éxito o proceso de acreditación imprescindible para acceder a prazas de función docente e compatibilizalo coa función asistencial. 

Ambas as dúas institucións queren facer que este modelo se estenda a todo o sistema sanitario, é dicir, para todos os profesionais de calquera hospital da rede do Servizo Galego de Saúde co obxecto de aproveitar todos os recursos do sistema sanitario público galego.

Tal e como destacou o conselleiro de Sanidade, con esta sinatura, a Xunta e a USC dan un paso adiante para facilitar o impulso á carreira docente entre os profesionais sanitarios galegos, flexibilizando o acceso e canalizándoo cara a novos camiños interesantes.

Gómez Caamaño incidiu en que este acordo reflicte un compromiso conxunto por mellorar e fortalecer a formación e a docencia no ámbito das Ciencias da Saúde e amosouse moi satisfeito de que dúas institucións tan vinculadas de forma histórica, como son Sanidade e a USC, sigan buscando e atopando novos camiños de colaboración.

O titular da carteira sanitaria puxo en valor que esta colaboración redundará positivamente no nivel de formación académica, así como na actualización dos coñecementos e na mellor capacitación dos profesionais, incidindo, así mesmo, en que a actividade docente e investigadora forma parte da cultura propia da actividade que se desenvolve no día a día do Sergas.

Incentivar a investigación e a docencia

Na súa intervención no acto de sinatura, o conselleiro considerou fundamental incentivar o achegamento dos profesionais á actividade investigadora e docente, especialmente nos inicios da carreira profesional, o que redundará na calidade da docencia nas áreas clínicas e, ademais, na investigación traslacional, instrumentos que o máximo responsable da saúde da cidadanía galega considera imprescindibles para a mellora da asistencia sanitaria presente e futura.

Gómez Caamaño subliñou que, grazas a este procotolo, os profesionais do Sergas terán a oportunidade de manterse actualizados, avanzando nas súas carreiras e achegando unha mellor atención aos pacientes.

Tal e como puxo de manifesto o conselleiro, a relevancia desta colaboración entre Sanidade e a USC facilitará que os profesionais que xa completaron a súa formación como especialistas poidan acadar a acreditación docente universitaria; e grazas ao apoio da figura do mentor, tanto no ámbito sanitario como da universidade, estarán guiados nun proceso tan relevante.

Destacou, ademais, a importancia que esta colaboración terá á hora de impulsar a investigación, facilitando estadías en centros internacionais de prestixio, o que enriquecerá o saber dos profesionais sanitarios galegos.

Xunto ao anterior, a colaboración entre Sanidade e a USC posibilitará a incorporación dos profesionais sanitarios aos programas de doutoramento e proxectos de investigación, feito que o conselleiro considera fundamental para seguir a innovar e mellorar a calidade asistencial.

Gómez Caamaño rematou a súa intervención destacando que o acordo hoxe asinado e bo para o Servizo Galego de Saúde e para os seus profesionais, para a Universidade de Santiago de Compostela e para os estudantes e os pacientes.