A Xunta destina 30 M€ para a primeira fase de adquisición de equipamento do Hospital Público Novo Montecelo

Santiago de Compostela, 30 de setembro de 2024

O Consello da Xunta abordou esta mañá a primeira fase do plan de investimentos do Hospital Novo Montecelo de Pontevedra, unha actuación en que o Goberno galego investirá 30 millóns de euros e que posibilitará avanzar na instalación do equipamento co obxectivo de comezar a tratar os primeiros pacientes a finais de 2025.

Así, esta fase inicial do plan de equipamento e dotación do Novo Montecelo conta con 14 tipoloxías e representará un dos principais investimentos que o Executivo galego ten previsto para o Servizo Galego de Saúde no proxecto de orzamentos do vindeiro ano.

Deste xeito, o Complexo Hospitalario Universitario de Pontevedra será o primeiro de Galicia en contar coa totalidade dos seus quirófanos dixitais, o que posibilitará a súa integración completa cos sistemas operativos do Servizo Galego de Saúde. Esta mellora, á cal a Xunta destinará unha partida de 1.480.000 euros, permitirá a interconexión dos diferentes equipos xeradores de imaxe no quirófano, a transferencia de imaxe e son fóra do propio quirófano, ademais da integración dos datos nos sistemas corporativos do Sergas (como a historia clínica electrónica IANUS).

Outro dos equipamentos previstos será o de imaxe intraoperatoria para mellorar a obtención de imaxes na área cirúrxica ou en contornos minimamente invasivos. O seu orzamento estimado é de 3.120.000 euros.

Dentro da área de cirurxía, tamén se prevén 2.620.000 euros para dotar o Novo Montecelo dunha central de esterilización para o procesamento do seu instrumental.

Ecógrafos, Radioterapia e Medicina Nuclear

A partida máis importante que inclúe a fase inicial do plan de dotación son os 5.023.315 millóns de euros que se destinarán á adquisición de equipos de ecografía con destino ao conxunto de servizos do novo hospital.

Así mesmo, os novos servizos de Radioterapia e Medicina Nuclear contan cunha consignación de 1.580.000 euros. Ademais, o Goberno galego licitará por 125.000 euros a compra de mobiliario clínico e equipamento, con destino a estas dúas unidades. Cómpre destacar que dotar con estas novas unidades o Hospital Público de Pontevedra evitará o desprazamento a Vigo de máis de 500 pacientes ao ano.

Entre as partidas reservadas para equipar o Novo Montecelo destaca tamén o investimento que se realizará para adquirir equipos de alta tecnoloxía, cuxo importe ascenderá, segundo as previsións, a 1.110.000 euros. En concreto, adquirirase equipamento para a realización de estudos xerais de cabeza e colon, de tórax, abdome e musculoesqueléticos, estudos neurolóxicos e cardiolóxicos. Nomeadamente, mercarase un tomógrafo computarizado para o servizo de Urxencias (659.000 euros) e investiranse 451.000 euros en dúas salas de radioloxía dixital sincronizada.

Farmacia hospitalaria e laboratorios

Pola súa banda, no que atinxe á farmacia hospitalaria, destinaranse máis de 2,5 millóns de euros para a robotización e automatización do almacenamento mediante sistemas de carrusel horizontal e vertical, co obxectivo de mellorar a rastrexabilidade e seguridade, e reducir o traballo automático do persoal na dispensación de medicamentos a pacientes ingresados ou ambulantes.

Tamén se adquirirá novo mobiliario e equipamento para os laboratorios de bioquímica, microbioloxía, hematoloxía e anatomía patolóxica. Dedicaranse 1.670.000 euros coa premisa de centralizar o fluxo das mostras e a información.

Outro equipamento hospitalario

O plan reserva 2.250.000 euros para a compra de camas de hospitalización xeral (1.285.000 euros), camas de pacientes críticos (615.000 euros) e cadeiras de brazos (350.000 euros).

Así mesmo, para a adquisición de elementos de suspensión e subministración estímanse 2.115.000 euros, incluíndo cabeceiros da área de críticos (1.210.000 euros), columnas de cirurxía e de anestesia (760.000 euros) e guindastres (145.000 euros).

Para mellorar o seguimento dos pacientes críticos ou inestables e a rastrexabilidade dos parámetros fisiolóxicos, o plan dedica 2.321.826 euros aos sistemas de monitorización de pacientes. Nesta epígrafe inclúese tamén un sistema de monitorización na área materno-fetal (313.390 euros) co cal se centralizará o seu seguimento.

Por último, na área de cociña hospitalaria investiranse 3.800.000 euros para equipar e adecuar as novas instalacións, e incluiranse 219.858 euros para a compra de cabinas de seguridade e mesas de traballo.

Adianto de investimentos

Este plan de investimentos do Novo Montecelo xa conta en 2024, como adianto, con 2,6 millóns de euros destinados á compra de lámpadas cirúrxicas (603.499 euros) e distintos tipos de respiradores (2.034.615 euros). Este equipamento, a medida que sexa recibido, será utilizado xa no actual hospital para o seu aproveitamento.

Do mesmo xeito, en 2023 investíronse 7,7 millóns de euros para dotar con equipamento de alta tecnoloxía os actuais servizos do hospital pontevedrés e cos cales se ampliarán os servizos do Novo Montecelo. Esta actuación foi financiada pola Unión Europea, a través do Plan de recuperación, transformación e resiliencia.

Así, permitiu adquirir, por un lado, dous equipos de tomografía computarizada e unha resonancia magnética -xa en uso no actual hospital-. E, polo outro, para crear en Pontevedra os servizos de Radioterapia e Medicina Nuclear, mercáronse dous aceleradores, unha gammacámara, un equipo de hemodinámica e outro de tomografía computarizada, que xa se atopan instalados no búnker do Novo Montecelo.