A Xunta destinou 3,5 M€ en axudas para apoiar iniciativas de empresas, autónomos e entidades sociais para o tratamento de residuos téxtiles en Galicia
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Ángeles Vázquez pon en valor o compromiso coa redución da xeración de refugallos, a economía circular e a innovación da empresa coruñesa, que produce un material novidoso e sostible a partir de material téxtil e aplicable en mobles e na construción
- Antes de final de ano publicarase unha nova convocatoria para financiar actuacións destinadas á preparación para a reutilización e a reciclaxe deste tipo de residuos, que os concellos deberán recoller de forma separada a partir do 1 de xaneiro de 2025
Estas imágenes pertenecen a Página Oficial de la Xunta de Galicia
Arteixo (A Coruña), 26 de setembro de 2024
A Xunta concedeu nos últimos anos 3,5 millóns de euros en axudas para apoiar iniciativas e proxectos promovidos en Galicia por empresas, autónomos, asociacións e fundacións sen ánimo de lucro relacionadas coa xestión e recuperación de residuos téxtiles recollidos de forma separada.
Así o subliñou a conselleira de Medio Ambiente e Cambio Climático, Ángeles Vázquez, durante a súa visita á planta que ten en Arteixo a empresa Insertega (Iniciativa Social Emprendedora da Reciclaxe Téxtil en Galicia), que se dedica precisamente ao tratamento deste tipo de residuos e aposta polo I+D+i nos seus procesos produtivos.
Acompañada da delegada territorial da Xunta na Coruña, Belén do Campo, e da directora xeral de Calidade Ambiental e Sostibilidade, María José Echevarría, a conselleira puxo esta firma como exemplo do "potencial deste sector" desde o punto de vista da creación de emprego verde, de calidade e inclusivo.
De feito, Insertega, que dá emprego directo a preto de 70 persoas, recibiu desde o ano 2022 dúas subvencións da Xunta por un importe global de 657.000 euros destinadas a ampliar e mellorar a planta de clasificación que ten a empresa en Almeiras (Culleredo) e as instalacións de Sabón que visitou esta mañá.
A conselleira explicou que, grazas a unha destas axudas, naceu o proxecto Equore, froito da unión entre Insertega e Ofimor Group e que actualmente se dedica á produción dun material novidoso e sostible fabricado a partir de refugallos téxtiles non recuperables. Trátase, concretamente, dun revestimento reciclado e personalizable en diferentes acabados e texturas con aplicacións moi interesantes para a fabricación de mobles e tamén no eido da construción.
Neste sentido, Ángeles Vázquez puxo en valor o esforzo e compromiso de empresas como estas cos obxectivos europeos de redución da produción de refugallos e o impulso á economía circular, que busca prolongar ao máximo a vida útil dos produtos a través de novos usos e aplicacións que permitan integralos de novo no mercado.
Ademais, destacou a importancia das outras dúas liñas de produción nas que está especializada a empresa coruñesa: por un lado, a preparación para a reutilización daqueles residuos téxtiles aptos para a súa venda posterior en tendas de segunda man e por outro, a fabricación de material reciclado que se utiliza despois como materia prima para a industria téxtil e outros usos. Unha actividade coa que, recalcou, evitouse a xeración de 14.000 toneladas de gases contaminantes.
Novas obrigas e necesidades
Cómpre lembrar que a Estratexia europea para a circularidade e a sustentabilidade dos produtos téxtiles propón que para o ano 2030 todos os produtos téxtiles comercializados na UE sexan reciclables e estean fabricados en gran parte a partir de fibras recicladas e libres de substancias perigosas.
Ademais, a partir do 1 de xaneiro do ano que vén os concellos de toda España terán que ter implantada a recollida selectiva dos residuos téxtiles de carácter doméstico, dúas circunstancias que xerarán novas necesidades para garantir a xestión desta fracción e tamén oportunidades de negocio nun sector moi importante en Galicia.
Por iso, Ángeles Vázquez anunciou que o seu departamento seguirá apoiando a aquelas pequenas e medianas empresas e entidades sen ánimo de lucro que decidan impulsar novos proxectos ou ampliar os que xa teñan en marcha para a xestión da fracción téxtil, unha colaboración que se concretará, segundo dixo, antes de que remate 2024 a través de novas convocatorias de axudas en liña coas publicadas nos dous anos anteriores.
