José González reafirma o compromiso da Xunta coa preservación da cultura galega no exterior durante o aniversario do Centro Galicia de Bos Aires
Estas imágenes pertenecen a xunta.gal
Bos Aires (A Arxentina), 26 de xullo de 2024
O conselleiro de Emprego, Comercio e Emigración, José González, acompañado polo delegado da Xunta na Arxentina, Alejandro López Dobarro, participou no acto do 45º aniversario do Centro Galicia de Bos Aires, coincidindo coa conmemoración do Día de Galicia e asinou no libro de honra da entidade. Alí, González destacou a importancia de manter vivos os lazos culturais e sociais entre Galicia e os galegos residentes na Arxentina, subliñando o compromiso continuo da Xunta en apoiar as iniciativas que favorecen a preservación da cultura galega no exterior. Ademais, na súa intervención o conselleiro dedicou unhas palabras en memoria das vítimas do palangreiro Argos Georgia, afundido en augas arxentinas.
No marco deste encontro, José González tamén tivo a oportunidade de ver o cadro A derradeira lección do mestre de Castelao, unha obra emblemática que simboliza a resistencia e a loita pola liberdade e a cultura galega. Neste contexto, remarcou o profundo respecto e admiración pola herdanza cultural de Galicia, reafirmando o compromiso da Xunta en preservar e promover a súa historia e tradicións entre as novas xeracións da diáspora.
