Martina Aneiros anima aos emprendedores de Ferrolterra a solicitar o bono autónomo antes do 30 de setembro
Estas imágenes pertenecen a xunta.gal
- A intensidade destas axudas da Consellería de Emprego, Comercio e Emigración son do 60% do investimento, cun importe máximo de 7.000 euros
- Poderán destinarse á adquisición de maquinaria ou ferramentas, equipos informáticos e de oficina, rótulos, reforma de local, novas instalacións para a mellora da eficiencia enerxética, investimento para o relevo de combustibles fósiles ou para o desenvolvemento de aplicacións informáticas, páxinas web, redes sociais ou deseño de marca
Narón (A Coruña), 27 de xuño de 2024
A delegada territorial da Xunta en Ferrol, Martina Aneiros, visitou esta mañá o centro de pádel San Mateo onde puxo en valor os apoios do Goberno galego aos autónomos. Máis concretamente, Aneiros fixo fincapé no Bono das persoas autónomas que pode solicitarse ata o próximo 30 de setembro.
Esta liña de axudas da Consellería de Emprego, Comercio e Emigración, da que se beneficiou o centro naronés a pasada convocatoria para o reacondicionamento da pista de pádel onde se instalou céspede proturf azul (recibiu unha achega de 3.000 euros), está orientada a apoiar a consolidación das autónomas e autónomos que leven como mínimo 42 meses de actividade empresarial.
A intensidade das axudas, tal e como informou a delegada, é do 60% do investimento cun importe máximo de 7.000 euros. Estarán destinadas á realización de investimentos para a mellora da competitividade como a adquisición de maquinaria ou ferramentas, equipos informáticos e de oficina, rótulos, reforma de local, novas instalacións para a mellora da eficiencia enerxética, investimento para o relevo de combustibles fósiles ou para o desenvolvemento de aplicacións informáticas, páxinas web, redes sociais ou deseño de marca.
O Bono Autónomo conta este ano cun orzamento de 8 M€ co que se poderán financiar os gastos que se realicen entre o 1 de xaneiro de 2024 e ata o final do prazo de presentación de solicitudes, o 30 de setembro.
"O emprego autónomo e a súa consolidación como un emprego de máxima calidade e xerador de riqueza e benestar é unha prioridade para a Xunta de Galicia", sinalou Aneiros que, para mostra, apuntou ás diferentes liñas de axudas e incentivos convocados periodicamente para a promoción e actividades iniciais ou de arranque, para facer fronte ás cotizacións sociais, como a cota cero para os que inicien a súa actividade como autónomos este ano- ou para fomentar a contratación de persoal. Tamén para axudas destinadas a súa mellora competitividade, mediante formación continua e outras ferramentas especialmente deseñadas para este colectivo.
