A Xunta destaca a dixitalización e a suma de talento como elementos clave para afrontar os retos futuros do naval galego
Estas imágenes pertenecen a xunta.gal
- O conselleiro de Facenda e Administración Pública, Miguel Corgos, participou na clausura da Xornada de Ciberseguridade no Sector Naval
- Recordou que o naval é un sector estratéxico para Galicia, que dá emprego a máis de 14.000 persoas e representa o 3,5 % do PIB, cunha facturación que rolda os 2.500 M€
- Afirmou que a Xunta seguirá apostando pola colaboración para avanzar na especialización tecnolóxica, adaptada ás necesidades específicas da Comunidade
Ferrol (A Coruña), 26 de xuño de 2024
O conselleiro de Facenda e Administración Pública, Miguel Corgos, destacou hoxe a dixitalización e a suma de talento como elementos clave para afrontar os retos futuros do naval galego.
Durante a súa intervención na clausura da Xornada de Ciberseguridade no Sector Naval, Miguel Corgos recordou que este é un sector estratéxico para Galicia, que dá emprego a máis de 14.000 persoas e representa o 3,5 % do PIB, cunha facturación que rolda os 2.500 millóns de euros. "Sabédelo ben aquí en Ferrol", dixo, recordando que a comarca conta con empresas punteiras na industria auxiliar do naval; co estaleiro de Navantia, cuxo apoio da Administración galega permitiu o desenvolvemento de innovacións tecnolóxicas que están a ser utilizadas na construción das Fragatas F-110; e con Navantia Fene, que ostenta o liderado na fabricación de estruturas para a eólica mariña.
O conselleiro de Facenda e Administración Pública afirmou que a Xunta seguirá apostando pola colaboración para avanzar na especialización tecnolóxica, adaptada ás necesidades específicas da Comunidade: á súa xeografía, á súa poboación e tamén aos seus sectores económicos estratéxicos. "O noso obxectivo é poñer a tecnoloxía ao servizo do benestar das persoas, da súa seguridade e da xeración de riqueza", abundou.
Nesta liña, salientou que, no ámbito da ciberseguridade, esta aposta pola especialización e pola colaboración plásmase no Nodo Ciber.Gal, un espazo de intercambio de información e recursos que naceu en 2020 sobre as bases dos acordos que a Xunta xa tiña co Centro Criptolóxico Nacional e co Instituto Español de Ciberseguridade, e que hoxe conta con máis de medio centenar de institucións e grandes empresas, entre elas, as principais compañías de Galicia do téxtil, a alimentación ou as finanzas.
O conselleiro de Facenda e Administración Pública concluíu lembrando que esta especialización en ciberseguridade culmina co Centro de Excelencia en Ciberseguridade de Galicia, cuxa construción acaba de comezar en Ourense, onde se concentrarán servizos e recursos e contará con espazos a disposición das empresas.
Así mesmo, resaltou que Galicia é a primeira rexión comunitaria que vén de adaptar a normativa da Intelixencia Artificial europea co desenvolvemento dunha lei propia, que non tardará en ser validada no Consello da Xunta como paso previo á súa tramitación no Parlamento.
