A Xunta traslada ao Concello de Viveiro a necesidade de pechar o acceso ao Souto da Retorta para realizar tarefas de mantemento e garantir a seguridade
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Marisol Díaz subliña que durante o verán levaranse a cabo actuacións como a eliminación de exemplares enfermos non recuperables e a poda de outros, ademais do plantado de especies autóctonas
Viveiro (Lugo), 26 de xuño de 2024
A Xunta de Galicia informou hoxe ao Concello de Viveiro da necesidade de pechar o acceso ao Monumento Natural Souto da Retorta para realizar tarefas de mantemento e garantir a seguridade.
A directora xeral de Patrimonio Natural, Marisol Díaz, explicoulle á alcaldesa da localidade, María Loureiro, que esta mesma semana comezarán a realizarse labores de rozadura e retiradas de ramas secas, polo que resulta convinte o peche temporal das visitas a este espazo natural tanto facilitar os traballos de mantemento e saneamento como para prever posibles riscos para as persoas.
A maiores, Díaz subliñou que durante o verán se levarán a cabo actuacións máis complexas como a eliminación de exemplares enfermos non recuperables e a poda de outros. Ademais, tamén se realizará o plantado de especies autóctonas.
Estas tarefas son necesarias porque os informes periódicos que realiza a Consellería de Medio Ambiente e Cambio Climático veñen detectando afeccións por diversos tipos de fungos que, xunto coa idade dos exemplares -os eucaliptos non son unha especie moi lonxeva-, supoñen un elevado risco de caída de pólas de grandes dimensións e, incluso, derrubamento de árbores.
De feito, nos últimos tempos os danos no arborado son máis evidentes cun bo número de pés coa punta seca ou moi debilitados, sen ramas ou follas vivas no terzo superior da copa, e, tamén, hai algúns con inclinacións importantes do fuste ou con podremias que poden reducir moito a resistencia mecánica ao derribo. Ademais, tamén se detectou que moitos gromos de follas xuvenís tamén están secos xa.
Cómpre lembrar que a Dirección Xeral de Patrimonio Natural realiza periodicamente traballos de poda en altura e de extracción de pés danados ou secos para evitar riscos para os visitantes. A última actuación leváronse a cabo en setembro de 2021 cando foi necesario actuar en algo menos dunha decena de exemplares, que incluía ao Avó.
O Souto da Retorta, que foi declarado monumento natural no ano 2000, está situado na parroquia de Chavín, no Concello de Viveiro, ten unha superficie de 3,18 hectáreas e sitúase nas proximidades do río Landro. Caracterízase pola presenza dun rodal de eucaliptos de gran singularidade, pola súa lonxevidade e polas extraordinarias dimensións das súas árbores. Estes eucaliptos superan os cen anos, destacando o exemplar denominado "O Avó". Tamén hai carballeiras galaico-portuguesas con Quercus robur e Quercus Pyrenaica.
