A Xunta amplía ata o 5 de setembro o prazo para solicitar os 6,5 M€ en axudas para apoiar o emprendemento en Galicia
- O Diario Oficial de Galicia (DOG) publica hoxe a modificación do prazo de solicitude desta convoctoria dirixida a pemes, autónomos, mutualistas e entidades da economía social que inicien a súa actividade ou o teñan feito desde o 1 de xaneiro de 2022
- A Xunta subvenciona investimentos relacionados coa adquisición de equipamento informático, mobiliario, en eficiencia enerxética, entre outros
- Como novidade este ano dáse cobertura tamén aos gastos notariais e de rexistro relacionados coa actividade desenvolvida
Santiago de Compostela, 26 de xuño de 2024
O Diario Oficial de Galicia (DOG) publica hoxe a orde da Consellería de Emprego, Comercio e Emigración pola que se amplía ata o 5 de setembro o prazo de presentación de solicitudes das subvencións para apoiar iniciativas emprendedoras dotadas con 6,5 millóns de euros para este 2024. Con esta convocatoria, a Xunta busca impulsar o emprendemento, contribuíndo ao incremento da actividade económica e á mellora da súa competitividade.
Poden optar a estes apoios os seguintes colectivos que se constitúan ou estean dados de alta e iniciaran a súa actividade económica desde o 1 de xaneiro de 2022: persoas traballadoras autónomas, mutualistas, pequenas e medianas empresas, sociedades cooperativas e laborais, así como as empresas de inserción e os centros especiais de emprego.
As achegas ás que poden acceder van dos 3.000 aos 30.900 euros (en función da magnitude do investimento realizado) para dar cobertura, entre outros, a gastos vencellados co proxecto empresarial en materia de equipamento informático, eficiencia enerxética, equipamento e mobiliario, ou na reforma das instalacións.
Como novidade nesta convocatoria fináncianse os gastos notariais e/ou rexistrais directamente relacionados coa actividade subvencionada que sexan indispensables para a súa axeitada preparación ou execución, cun máximo de 300 euros por persoa beneficiaria. Tamén os gastos de aluguer correspondentes ao local ou centro de traballo no que se realice a actividade subvencionada cun máximo de 600 euros por persoa beneficiaria.
A través desta iniciativa, a Xunta de Galicia continúa a apoiar con fondos propios as iniciativas de emprendemento de persoas traballadoras autónomas e de pequenas e medianas empresas, para fortalecer a súa actividade ante os retos derivados do actual contexto económico e avanzar no seu desenvolvemento sustentable e no mantemento dun emprego de calidade.
Ligazón á orde no DOG:
https://www.xunta.gal/dog/Publicados/2024/20240626/AnuncioG0767-210624-0004_gl.html
