Galicia e as rexións europeas amosan o seu compromiso con zonas rurais máis dinámicas e atractivas
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O director xeral de Relacións Exteriores e coa UE participou no pleno do Comité Europeo das Rexións, no que os membros se sumaron ao diálogo sobre o futuro da agricultura na UE
- Galicia recibiu o premio á Rexión Europea Emprendedora 2025 pola súa capacidade de promover unha estratexia empresarial innovadora e de loitar contra os desafíos das zonas rurais
- Na sesión plenaria tamén se debateron outras cuestións, como iniciativas para vixiar a saúde dos solos europeos, promover a xestión sostible da auga ou impulsar a innovación e a investigación a nivel local e rexional
Estas imágenes pertenecen a Página Oficial de la Xunta de Galicia
Bruxelas, 20 de xuño de 2024
O director xeral de Relacións Exteriores e coa UE, Jesús Gamallo, representou hoxe a Galicia na sesión plenaria do Comité Europeo das Rexións (CdR). O Goberno galego presentou nesta ocasión sete emendas para un total de dez ditames.
De entre eles, o máis destacado foi o relativo ao futuro da Política Agrícola Común europea (PAC), que aborda os futuros cambios que se deberían introducir para apoiar de maneira máis eficaz os agricultores, á vez que promove unha actividade agrícola máis sostible e unhas zonas rurais máis atractivas e dinámicas.
Neste eido, Galicia intenta impulsar a actividade agrícola e reverter o despoboamento das zonas rurais mediante medidas de promoción da remuda xeracional do sector. En palabras do director xeral, que puxo de relevo a estratexia galega, "é crucial apoiar a mocidade para que acceda a coñecementos e actividades rendibles".
Outras cuestións de importancia para Galicia
Ademais do relativo ao futuro da PAC, a Xunta tamén presentou emendas a outros dous ditames relevantes para a nosa rexión: un sobre a proposta lexislativa destinada a crear un marco obrigatorio de avaliación da saúde do solo na UE e outro sobre o chamamento a establecer un Pacto Azul Europeo co que protexer os recursos hídricos e evitar a súa escaseza e contaminación.
A este respecto, os membros do CdR subliñaron o papel dos entes locais e rexionais como xestores da auga e das políticas ambientais no terreo, e sinalaron a urxencia de converter a resiliencia hídrica nunha prioridade estratéxica para o próximo mandato da Comisión Europea.
Outro dos puntos destacados do pleno foi o debate centrado en mellorar o apoio á innovación e a investigación nas rexións europeas, que contou coa participación de Iliana Ivanova, comisaria de Innovación, Investigación, Cultura, Educación e Xuventude, e Elisa Ferreira, comisaria de Cohesión e Reformas. A reflexión centrouse no potencial dos vales de rexionais de innovación -unha iniciativa conxunta da política de cohesión europea e o programa Horizonte Europa que busca fortalecer os ecosistemas de innovación rexionais- para potenciar o desenvolvemento territorial sostible e competitivo na UE.
Galicia, Rexión Emprendedora Europea 2025
No marco desta última sesión plenaria Galicia recibiu, xunto con outras dúas rexións europeas, o premio Rexión Emprendedora Europea 2025 que recoñece a aposta da Xunta por desenvolver o potencial da comunidade a través de actividades empresariais que contribúan a fixar poboación.
Este galardón foille entregado ao conselleiro de Emprego, Comercio e Emigración, José González, e pon en valor a estratexia de política empresarial galega como unha das máis destacadas e innovadoras de Europa, polo seu potencial para impulsar dunha maneira viable e a longo prazo o emprendemento e o crecemento económico sostible. Na entrega de premios, o presidente do CdR, Vasco Alves Cordeiro, destacou o compromiso da Xunta na loita contra o envellecemento e o despoboamento, mediante o fomento do espírito empresarial nas zonas rurais.
Comité Europeo das Rexións
O Comité Europeo das Rexións é a asemblea consultiva na que están representados os entes locais e rexionais da Unión Europea. A sesión plenaria do CdR reúnese seis veces ao ano. En representación da Comunidade Autónoma de Galicia, o membro titular é o propio presidente da Xunta, mentres que o cargo de membro suplente recae no director xeral de Relacións Exteriores e coa UE.
