A Xunta creará a figura da promotora de saúde na comunidade xitana nas sete áreas sanitarias cun investimento de máis dun millón de euros
- O Diario Oficial de Galicia publica a concesión da subvención á Fundación Secretariado Xitano para realizar actividades lideradas por mulleres coas que promover unha alimentación equilibrada ou a realización de actividade física
- O Plan Obesidade Zero en Galicia ten en conta a realidade socioeconómica da poboación para facilitar que todas as persoas teñan igualdade de oportunidades para desenvolver e manter a súa saúde
Santiago de Compostela, 19 de xuño de 2024
O Diario Oficial de Galicia publica hoxe a concesión á Fundación Secretariado Xitano de 1.015.000 euros ata 2027 cos que promover a saúde neste colectivo. Deste xeito, a Consellería de Sanidade apoia un proxecto en cada área sanitaria encabezado por unha traballadora de etnia xitana que actuará como promotora de saúde.
A promotora de saúde de cada un dos sete proxectos recibirá unha formación común e inicial en materia de promoción de hábitos de vida saudables. A continuación, realizarase unha recollida de información sobre a situación da poboación xitana mediante unha enquisa inicial. Nunha fase posterior, desenvolveranse actividades para o fomento de estilos de vida saudables na comunidade e a diminución dos seus factores de risco. Para iso, actuarase na promoción e na educación para a saúde de acordo ao seu propio contexto e tendo en conta os resultados obtidos na enquisa en cada territorio.
Desde este ano e ata 2027, esta entidade sen ánimo de lucro desenvolverá formación continuada para a promotora de saúde contratada para a mellora e o reforzo das habilidades e coñecementos necesarios cos que promover a saúde na súa contorna. Finalmente, realizarase unha avaliación e mellora continua das actividades implantadas en cada territorio.
Polo tanto, valoráronse os proxectos que buscan reducir as desigualdades existentes e potenciar a participación comunitaria na promoción da saúde da poboación de etnia xitana para fomentar unha alimentación equilibrada, a actividade física, a prevención de accidentes e a redución do consumo de tabaco, alcol e outras substancias prexudiciais para a saúde.
Esta iniciativa enmárcase no Plan Obesidade Zero en Galicia que está a levar a cabo a Dirección Xeral de Saúde Pública. Entre os seus obxectivos, atópase promover a saúde nos barrios e, nese ámbito, téñense en conta as necesidades da comunidade xitana para promover a equidade en saúde, é dicir, que todas as persoas teñan igualdade de oportunidades para desenvolver e manter a súa saúde, a través dun acceso xusto aos recursos.
