Fabiola García lembra as vantaxes na declaración da renda para as familias galegas con dous ou máis fillos
Estas imágenes pertenecen a xunta.gal
- Por primeira vez, os fogares con dous rapaces poden aplicarse unha dedución fiscal de 250 euros, mentres a rebaixa para as familias con tres fillos se duplicou ata os 500 euros e, a partir de aí, súmanse 250 máis por cada un
- Ata o próximo 1 de xullo os galegos poden beneficiarse desta medida coa que Galicia volve ser pioneira, como a primeira comunidade que equipara a nivel fiscal as familias con dous fillos e as numerosas
O Pino (A Coruña), 23 de maio de 2024
A conselleira de Política Social e Igualdade, Fabiola García, lembrou esta mañá que as familias galegas con dous fillos poden deducirse 250 euros na declaración da renda. Foi nunha visita á escola infantil pública autonómica do Pino, en plena recta final do curso e coa campaña fiscal aínda en marcha.
Ademais de aprobar esta nova dedución, que pode aplicarse por primeira vez dende este ano, a Xunta duplicou ata os 500 euros a rebaixa para as familias numerosas de categoría xeral con tres fillos. A partir do cuarto, as familias numerosas de categoría especial poden sumar un desconto de 250 euros por cada rapaz.
Fabiola García destacou a importancia de revisar o apartado de deducións autonómicas no borrador da declaración, porque estas vantaxes non veñen marcadas por defecto. As familias que aínda non a presentaron poden facelo ata o próximo 1 de xullo, e as que xa o fixesen, aínda están a tempo de presentar unha declaración adicional ata ese día para engadir estas deducións.
Galicia foi a primeira comunidade en equiparar a nivel fiscal, as familias con dous fillos coas familias numerosas, igual que foi pioneira en establecer a gratuidade da matrícula das escolas infantís para nenos de 0 a 3 anos no 100 % dos centros, independentemente da súa titularidade (municipal, autonómica, privada ou de iniciativa social).
Listas de admisión definitivas das escolas infantís
No caso das escolas infantís públicas autonómicas, o próximo 31 de maio publicaranse as listas definitivas de admitidos para o curso que vén. Segundo as listas provisionais, acadaron praza o 86 % das familias que pediron renovala ou obtela por primeira vez. Isto supón un aumento do 2 % con respecto ao curso anterior, con 7.287 nenos que resultaron admitidos: 141 máis.