O conselleiro de Emprego, Comercio e Emigración inicia un proceso de escoita activa coa patronal e os sindicatos para dar solucións aos novos retos

Santiago de Compostela, 29 de abril de 2024

O conselleiro de Emprego, Comercio e Emigración, José González, acompañado polo secretario xeral de Emprego e Relacións Laborais, Pablo Fernández, iniciou hoxe unha rolda de contactos con patronal e sindicatos que arrancou cunha xuntanza co presidente da Confederación de Empresarios de Galicia (CEG), Juan Manuel Vieites, en San Lázaro. 

González explicou, ao inicio da xuntanza, que nos vindeiros días celebraranse tamén reunións cos diferentes representantes de UXT, CCOO e CIG e dos diferentes foros con competencias na nova Consellería, como son, entre outros, os autónomos, a economía social e o comercio, para continuar deseñando programas da man dos axentes sociais e económicos co triplo obxectivo de conseguir un emprego de calidade nun mercado laboral dinámico e inclusivo e un crecemento económico intelixente; garantir a competitividade do tecido comercial, asegurando a súa viabilidade e impulso e o relevo xeracional; e redobrar a aposta polo retorno das galegas e galegos no exterior. 

O conselleiro fixo fincapé que unha das preocupacións principais é a escasez de man de obra -hai 12.000 vacantes sen cubrir- para o que apuntou que é preciso reter e atraer novo talento con programas como o Retorna Cualifica Emprego para dar a oportunidade de voltar a Galicia aos descendentes de emigrantes galegos de primeira, segunda ou terceira xeración. En definitiva, na reunión incidiu na aposta do Goberno galego pola colaboración público-privada a través dos procesos de escoita activa cos que hoxe arrancou cunha xuntanza coa Confederación de Empresarios de Galicia (CEG) para dar solucións aos retos da nova Consellería de Emprego, Comercio e Emigración.