A Xunta destina 472.000 euros a 14 novos proxectos turísticos para o litoral de oito concellos da Mariña
Estas imágenes pertenecen a xunta.gal
- Vén de resolver a segunda convocatoria de axudas do 2023 para embelecemento dos recursos e introdución de medidas sustentables, dixitais, accesibles ou inclusivas
- Súmanse ás 10 propostas financiadas na primeira fase cun orzamento de 286.000 euros
Lugo, 11 de abril de 2024
A Xunta de Galicia vén de resolver a segunda das convocatorias realizadas o pasado ano do programa de axudas destinado a concellos galegos para o embelecemento do litoral e o impulso do seu uso turístico. Na provincia de Lugo suma un investimento de 472.200 euros distribuídos entre 14 proxectos de oito concellos da Mariña.
Os apoios están orientados á mellora dos recursos e á introdución de medidas sustentables, dixitais, accesibles ou inclusivas, financiando propostas como a instalación ou reforma de casetas de información, postos de socorro e aseos, acondicionamento de sendeiros, creación de app turísticas ou instalación de elementos interactivos, entre outras.
As achegas veñen a sumarse ás concedidas na primeira convocatoria: 286.000 euros para 10 proxectos en sete concellos. Deste xeito, no cómputo anual esta liña de axudas permitiu desenvolver seis iniciativas no Vicedo; tres en Xove, Cervo, Ribadeo, Viveiro e Foz; dúas en Burela e uha en Barreiros.
Esta é unha das actuacións incluídas no Plan Territorial de Sostibilidade Turística do Litoral posto en marcha polo Goberno galego con fondos Next Generation, que conta cun orzamento global de 29,3M€. Enmárcase no Plan de Recuperación, Transformación e Resiliencia para aproveitar o financiamento europeo no camiño á transformación dixital e o incremento da competitividade dos destinos.
Inclúe a posta en marcha de medidas transversais destinadas ao litoral galego como dúas convocatorias anteriores para concellos e establecementos para rehabilitación de recursos emblemáticos do litoral galego, xa resoltas, así como a construción da senda do litoral de Galicia. Por outra banda, no marco deste Plan Territorial do Litoral as entidades locais están executando distintos Plans de Sostibilidade Turística en Destino.
