A xornalista e escritora lucense, Pilar Falcón, presentou na Casa de Galicia en Madrid o seu libro "Un camiño de cine xacobeo"

Madrid, 3 de abril de 2024

O director da Casa de Galicia en Madrid, Javier Vázquez, participou na presentación da segunda edición do libro de Pilar Falcón,  "Un camiño de cine xacobeo", obra da que é autora e que constitúe a máis extensa recompilación do filmado sobre o Camiño de Santiago. 

Ademais de Javier Vázquez, que foi o encargado de dar a benvida ao público que enchía a sala,  interveu o crítico cinematográfico e ex fiscal xeral do Estado, Eduardo Torres-Doce.

Entre os asistentes ao acto estiveron o expresidente do Goberno Mariano Rajoy, o embaixador Nicolás Pascual de la Parte, o tenente xeral Luís Manuel Martínez Meijide,  o editor José Luís Pardo, o escritor Juan Manuel de Prada, as deputadas Rosa Quintana, Cristina Abades e Irene Garrido, o presidente da Asociación de Críticos Literarios, Angel Basanta, os xornalistas José María Besteiro e Martín Barreiro, o representante en España da embaixada dos estados árabes e unha nutrida representación das asociacións galegas na capital, unha das cales preside a autora, o Club de Xornalistas Galegos en Madrid.

O libro recolle carteis, datos técnicos e comentarios dunha ampla colección de películas, series e documentais, nacionais e internacionais, filmados para a gran e pequena pantalla sobre o Camiño de Santiago. En total reúne 53 títulos datados entre 1915 e 2022 que supoñen o recoñecemento do xénero Cine Xacobeo.

A eles referiuse Torres-Doce afirmando que se trata dunha obra necesaria para valorar o interese do Camiño no cine e que achega outra forma de facer o camiño. Mostrouse rotundo ao afirmar que a gran película do camiño de Santiago está por facer e que seguramente non a fará nin un director galego nin español, até se podería facer un western asegurou.

Pola súa banda a autora apreciou o papel do cine como testemuña dos cambios sociais e transmisor de emocións: "O cine xacobeo desvélanos como foi evolucionando esta forma de camiñar", pasando "da capa e a esclavina, a cuncha venera (a vieira) e o bordón e a cabaza" a "a cámara fotográfica en bandoleira con libro de notas e hoxe o móbil que serve para todo, incluído gravar e colgar en redes".

Segundo Falcón, nos documentais do Cine Xacobeo "vese o ben que explotan as emocións os americanos. O cine español sábeo facer en Footprints, o Camiño da túa vida". "Temos todos os xéneros cinematográficos e moito camiño para apostar por esta disciplina como a mellor maneira de promover o Camiño de Santiago ao mundo", afirmou.

A autora mostrouse agradecida pola acollida que tivo, que levou a unha segunda edición a menos de tres anos da primeira.