A Xunta pon en servizo 35 novas prazas de aparcamento no marco da 2ª fase de humanización da avenida de Galicia de Vigo
Estas imágenes pertenecen a xunta.gal
- O pasado venres habilitouse un aparcadoiro con 22 prazas e hoxe prevese abrir parcialmente o segundo, con outras 13 prazas á disposición dos veciños
- O Goberno galego avanza así na execución das obras de acondicionamento da PO-323 en Teis, centradas nesta segunda fase en 1,5 km entre o IES e o límite con Redondela
- A actuación de humanización, que supón un investimento autonómico de 4,1 M€, prevé crear 3 zonas de estacionamento e incrementar nun 38 % as prazas existentes
- Ademais, a Xunta complementará as obras xa executadas na primeira fase da reforma da avenida de Galicia coa construción dun novo aparcadoiro que se poñerá en servizo en maio
Santiago de Compostela, 25 de marzo de 2024
O avance na execución das obras da 2ª fase da humanización da avenida de Galicia en Teis permite poñer en servizo 35 novas prazas de aparcamento nesta área do concello de Vigo.
Estas son as primeiras novas prazas de aparcadoiro previstas na actuación que a Xunta está a executar na estrada PO-323 en Teis, centradas nesta segunda fase no treito de algo máis de 1,5 km, entre o IES e o límite co concello de Redondela.
As obras, ás que o Goberno galego destina 4,1 M€, prevén habilitar 3 zonas de aparcamento.
O pasado venres púxose en servizo un aparcadoiro con 22 prazas, na marxe esquerda da PO-323, á altura do punto quilométrico 3, con acceso directo á vía verde. E hoxe mesmo prevese poñer en servizo parcialmente o aparcamento anexo, habilitando 13 novas prazas.
Con esta 2ª fase de humanización da avenida de Galicia en execución, búscase fomentar a mobilidade segura e sostible, así como mellorar a mobilidade interna na cidade de Vigo, para o que se realizan conexións coa trama urbana de beiravías existentes e con itinerarios alternativos, como a senda da vía verde.
A actuación inclúe a reposición de pavimento dos itinerarios existentes, a execución de zonas de aparcadoiros e a habilitación de pasos peonís sobreelevados nas interseccións que permitan a interconexión con outros itinerarios peonís. Nas zonas onde o espazo dispoñible o permite disporase arborado.
En canto aos novos aparcadoiros incluídos nestas obras executaranse tres novas zonas cun total de 167 prazas, o que unido ás prazas que se conservarán nas marxes da estrada, implica que haberá 273 prazas no ámbito da obra. Así, gañaranse 75 prazas con respecto ás 198 actuais, un incremento do 38 %.
Esta 2ª fase do proxecto de humanización da avenida de Galicia completará as actuacións executadas na 1ª fase de humanización desta vía no treito de 500 metros que vai desde a avenida da Mariña Española ao IES de Teis, e que supuxeron un investimento de 2,5 M€.
A Xunta vai complementar esas obras da primeira fase coa execución dun aparcadoiro que prevé poñer en servizo en maio.
O investimento autonómico para a reforma integral da PO-323 en Teis supera os 6,5 millóns de euros.
A Xunta impulsa esta actuación ao abeiro do Plan de recuperación, transformación e resiliencia, financiado pola Unión Europea-NextGeneration-EU.
