A Xunta colabora con preto de medio cento de empresas do sector para enxalzar a calidade da produción galega na feira internacional Alimentaria de Barcelona
- O Goberno autonómico tamén organiza diferentes actividades para os asistentes, como catas comentadas, talleres e demostracións de cociña co fin de promocionar os produtos galegos de calidade diferenciada
- O director da Axencia Galega da Calidade Alimentaria, José Luis Cabarcos, asistiu hoxe á primeira xornada deste evento, onde resaltou a importancia de participar neste tipo de feiras para poñer en valor a produción alimentaria galega diferenciada
- A Consellería do Mar conta cun espazo propio para o sector pesqueiro no que están presentes máis dunha vintena de empresas co obxectivo de coñecer as últimas tendencias do mercado e alcanzar acordos comerciais con novos clientes
L'Hospitalet de Llobregat (Barcelona), 18 de marzo de 2024
A Xunta de Galicia participa na feira Alimentaria, que se está a celebrar no recinto Fira Barcelona ata o vindeiro día 21 en horario de 10,00 a 19,00 horas, coa presenza de preto de medio cento de empresas coexpositoras do sector alimentario. Dentro da aposta da Xunta de Galicia pola posta en valor deste eido tamén se organizaron diferentes actividades para os asistentes ao evento, como catas comentadas, talleres e demostracións de cociña co fin de promocionar os produtos galegos de calidade diferenciada.
A Consellería do Medio Rural participa na feira coa presenza de 20 empresas coexpositoras distribuídas en tres superficies diferentes en dous pavillóns. Ademais, Medio Rural habilitou unha Aula de Experiencias de Calidade na que se desenvolverán actividades destinadas a promocionar estes produtos. Haberá catas comentadas, talleres e showcookings en colaboración cos consellos reguladores correspondentes.
Pola súa banda, a Consellería do Mar participa co seu propio espazo, que ocupa 500 m2 de zona expositiva repartidos en tres áreas para as empresas coexpositoras e unha zona para cociña, descanso e centro de negocios. Están presentes un total de 25 empresas da conserva e da transformación de peixes e mariscos, xunto a asociacións entre as que se atopan Anfaco Cecopesca ou Mexillón de Galicia.
Un escaparate de referencia
O director da Axencia Galega da Calidade Alimentaria, José Luis Cabarcos, asistiu hoxe á primeira xornada deste evento, que se posiciona como un escaparate de referencia no que poñer en valor os produtos alimentarios galegos, abrilos a novos mercados internacionais e poñer en contacto directo aos nosos produtores con distribuidores potenciais. Neste sentido, están presentes produtos con denominación de orixe, indicación xeográfica protexida, agricultura ecolóxica e Artesanía Alimentaria.
Ademais, recalcou a importancia do novo Plan anual de promoción dos produtos agroalimentarios galegos de 2024 -avaliado polo Consello da Xunta a semana pasada- que conta cun orzamento de 9,5 millóns de euros para fortalecer e consolidar o compromiso do Goberno autonómico con este sector, "referencial" da nosa comunidade.
Sabor a mar
Este martes asistirá á feira o conselleiro do Mar en funcións, Alfonso Villares, para visitar aos coexpositores presentes no stand da Consellería do Mar neste evento, no que leva participando desde o 2012, levando o mellor sabor do mar galego e contribuíndo a facilitar a presenza das empresas galegas do sector pesqueiro. Desde o departamento que dirixe Alfonso Villares faise unha aposta por estas plataformas como fórmula máis axeitada para coñecer de primeira man as últimas tendencias do mercado e facilitar acordos comerciais con novos clientes.
