Decreto polo que se determinan as actuacións dirixidas a reducir e evitar a contaminación producida por nitratos procedentes de fontes agrarias na Comunidade Autónoma de Galicia

Órgano ou entidade impulsora: Dirección Xeral de Gandaría, Agricultura e Industrias Agroalimentarias

Departamento: Consellería do Medio Rural - Dirección Xeral de Gandaría, Agricultura e Industrias Agroalimentarias

Estado actual: Consulta pechada

Prazo no que estivo aberta a consulta: 15/07/2025 - 30/07/2025

Información sobre a norma :

• Antecedentes:

  Constitúen antecedentes normativos a este anteproxecto de decreto a regulación contida tanto na Directiva 91/676/CEE, do Consello, do 12 de decembro, relativa á protección das augas contra a contaminación producida por nitratos utilizados na agricultura, como no Real decreto 47/2022, do 18 de xaneiro, sobre protección das aguas contra a contaminación difusa producida polos nitratos procedentes de fontes agrarias.

• Problemas que se pretenden solucionar:

  A día de hoxe, na Comunidade Autónoma de Galicia non se teñen declarado zonas vulnerables de acordo coa Directiva 91/676/CEE e o Real decreto 47/2022, do 18 de xaneiro, toda vez que non se ten acreditada a orixe agraria da presenza de nitratos nas augas, segundo o esixido na normativa de aplicación. O informe de presións e impactos, que serven de base para acreditar a orixe dos nitratos, atópase a día de hoxe en fase de elaboración por parte do Estado e non se rematou aínda, e polo tanto non se dispón nesta data dos datos definitivos e concluíntes sobre as presións agropecuarias, urbanas e outras que poidan considerarse significativas. En consecuencia, non procede ata agora efectuar esa designación. Non obstante, coa elaboración deste anteproxecto de decreto preténdese solucionar a necesidade dunha regulación autonómica específica que concrete o procedemento a seguir para, se é o caso, designar tales zonas na Comunidade Autónoma de Galicia e para a aprobación dos programas de actuación.

  Por outra banda, este anteproxecto atende á necesidade dunha regulación da planificación da xestión integral das dexeccións gandeiras en Galicia, dada a relevancia do sector gandeiro no ámbito territorial autonómico galego, coa fin de contribuír á redución da contaminación por nitratos e asegurando a continuidade da actividade gandeira, e regula a promoción dunha Rede autonómica integrada de instalacións de eliminación e valorización das dexeccións gandeiras.

• Necesidade e oportunidade da súa aprobación:

  Conforme aos principios de necesidade e eficacia, trátase dunha norma necesaria para regular de forma específica o procedemento a seguir para tramitar, de ser o caso, a designación das zonas vulnerables, co fin de reducir a contaminación causada polos nitratos de orixe agraria e actuar preventivamente contra novas contaminacións desta clase, de acordo co exixido no Real decreto 47/2022, do 18 de xaneiro, que traspón ao ordenamento xurídico español a Directiva de nitratos.

• Obxectivos:

  O obxectivo deste decreto é a determinación das actuacións dirixidas a reducir e evitar a contaminación producida por nitratos procedentes de fontes agrarias na Comunidade Autónoma de Galicia. En particular, o decreto ten por obxecto determinar o procedemento aplicable na comunidade autónoma para a posterior designación das zonas vulnerables, se procede, de acordo cos estudos e informes previos. Así mesmo, regula a forma de elaboración dos códigos de boas prácticas agrarias e o procedemento a seguir para a aprobación, se é o caso, dos programas de actuación, no marco establecido polo Real decreto 47/2022, do 18 de xaneiro, sobre protección das augas contra a contaminación difusa producida polos nitratos procedentes de fontes agrarias.

  A norma tamén ten por obxectivo contribuír á redución da contaminación por nitratos, asegurando a continuidade da actividade gandeira, mediante unha regulación do Plan autonómico de xestión integral das dexeccións gandeiras, e promover a creación dunha Rede autonómica intregrada de instalacións de eliminación e valorización das dexeccións gandeiras.

• Posibles solucións, alternativas, regulatorias e non regulatorias:

  Co fin de desenvolver actuacións que eviten e reduzan a contaminación producida por nitratos procedentes de fontes agrarias na Comunidade Autónoma de Galicia resulta de interese a regulación que derivará da entrada en vigor deste decreto, consistente na elaboración do Código de Boas Prácticas, mediante resolución da persoa titular da consellería competente en materia de agricultura e gandería, e a aprobación de programas de actuación, nos casos en que sexa preciso, mediante orde da mesma persoa titular. Tamén resulta de interese para a consecución de tal fin a regulación do procedemento para a aprobación dun Plan autonómico de xestión integral das dexeccións gandeiras e a creación dunha Rede autonómica integrada de instalación de eliminación e valorización das dexeccións gandeiras.

• Rango da norma:

  Decreto

Achegas e opinións recibidas: 5