Acuerdo de la Mesa del Parlamento por el que se aprueba la versión en occitano (aranés) de la Ley 6/2025, de 21 de mayo, de modificación de la Ley 16/2014, de acción exterior y de relaciones con la Unión Europea

De conformidad con lo dispuesto por el artículo 6.5 del Estatuto de autonomía de Cataluña; el artículo 4 de la Ley 2/2007, de 5 de junio, del Diari Oficial de la Generalitat de Catalunya, y el artículo 7 de la Ley 35/2010, de 1 de octubre, del occitano, aranés en Arán, la Mesa del Parlamento, en la sesión celebrada el día 3 de junio de 2025, ha aprobado la versión en occitano, en variedad aranesa, de la Ley 6/2025, de 21 de mayo, de modificación de la Ley 16/2014, de acción exterior y de relaciones con la Unión Europea, aprobada por el Pleno del Parlamento en la sesión celebrada el día 7 de mayo de 2025 y publicada en el Butlletí Oficial del Parlament de Catalunya número 230, de 22 de mayo de 2025, y en el Diari Oficial de la Generalitat de Catalunya número 9419, de 23 de mayo de 2025, cuyo texto se reproduce a continuación, a efectos de su publicación en el Diari Oficial de la Generalitat de Catalunya e inclusión del número y la fecha de la ley publicada, así como la fórmula de promulgación.

Palacio del Parlamento, 3 de junio de 2025

Judit Alcalá González

Secretaria cuarta

Josep Rull i Andreu

Presidente

"Lei 6/2025, de 21 de mai, de modificacion dera Lei 16/2014, d'accion exteriora e de relacions damb era Union Europèa

Eth president dera Generalitat de Catalonha

Es articles 65 e 67 der Estatut preven qu'es leis de Catalonha son promulgades, en nòm deth rei, peth president o presidenta dera Generalitat. Cossent damb çò precedent promulgui era següenta

LEI

Preambul

Eth títol V der Estatut d'autonomia de Catalonha reconeish e delimite es relacions dera Generalitat damb era Union Europèa (capítol II) e es diuèrses dimensions dera sua accion exteriora (capítol III), en tot regular ua practica fòrça estenuda, en tot fixar naues hites de projeccion europèa e internacionau e en tot definir es esturments entà artenher-les. Atau, d'acòrd damb er article 184 der Estatut, era Generalitat paticipe, enes tèrmes qu'establissen aguest Estatut e era legislación der Estat, enes ahèrs restacadi damb era Union Europèa qu'afècten as competéncies o as interèssi de Catalonha. E, d'acòrd damb er article 193 der Estatut, era Generalitat a d'impulsar era projeccion de Catalonha en exterior e promòir es sòns interèssi en aguest encastre, en tot respectar era competéncia der Estat en matèria de relacions exteriores, e a capacitat entà amiar a tèrme accions damb projeccion exteriora que deriven dirèctament des sues competéncies, sigue de manèra dirècta, sigue per mejan des organs dera Administracion generau der Estat.

D'auta part, er article 136 der Estatut establís que correspon ara Generalitat era competéncia exclusiva en matèria d'ordenament e organizacion dera foncion publica.

Entà desplegar coerentament es disposicions der Estatut en encastre dera accion exteriora, eth Parlament de Catalonha aprovèc era Lei 16/2014, de 4 de deseme, d'accion exteriora e de relacions damb era Union Europèa, qu'establís es principis rectors e es fins dera accion exteriora dera Generalitat, es sòns encastres de desplegament sectoriau, es foncions des actors que i participen e es esturments damb es quaus s'amie a tèrme.

Era disposicion addicionau prumèra dera Lei 16/2014 establís qu'eth Govèrn a d'amiar a tèrme eth desplegament reglamentari de besonh e adoptar es mesures avientes entà dotar era Administracion dera Generalitat de personau damb preparacion e coneishements especifics entà exercir es foncions que li corresponen en encastre dera accion exteriora de Catalonha e en encastre des relacions dera Generalitat damb era Union Europèa.

D'acòrd damb er article 16 deth tèxte unic dera Lei dera foncion publica dera Administracion dera Generalitat de Catalonha, aprovat peth Decrèt legislatiu 1/1997, de 31 d'octobre, peth quau s'apròve era rehonuda en un tèxte unic des precèptes de determinadi tèxtes legaus en vigor en Catalonha en matèria de foncion publica, era creacion de còssi s'a de hèr per lei e damb eth contengut qu'establís er article 17 d'aguest tèxte unic.

Ei de besonh, donc, disposar d'un còs de foncionaris format per persones damb es coneishements e aptituds de besonh entath bon exercici des foncions qu'eth títol V der Estatut comande ara Generalitat en matèria d'accion exteriora e de relacions damb era Union Europèa. Era creacion deth Còs d'Accion Exteriora e Union Europèa a de garantir qu'era dimension exteriora des competéncies dera Generalitat e era projeccion exteriora dera societat catalana se planifiquen e s'executen dera manèra mès eficaça e eficienta possibla, damb er objectiu de generar eth maxim impacte positiu entàs interèssi de Catalonha.

Damb aguesta iniciativa se vò incrementar era capacitat d'atrèir e retier talent, garantir qu'era Administracion publica catalana dispòse d'un personau preparat e damb es coneishements e aptituds especifics que requerís un prètzhèt amiat a tèrme en exterior o damb actors internacionaus, e poder auançar de cap a modèls de gestion mès eficients e capables de profitar eth coneishement aquerit peth madeish personau, en tot establir ath viatge mecanismes de desvolopament e de melhorament professionau per mejan dera Escòla d'Administracion Publica de Catalonha.

Aguesta lei s'estructure en un article, que modifique era Lei 16/2014, e tres disposicions finaus. Er article hig ua disposicion addicionau ara Lei 16/2014 entà crear eth Còs d'Accion Exteriora e Union Europèa. Damb aguesta fin, er article regule: en apartat 1, era creacion deth Còs; en apartat 2, es foncions; en apartat 3, eth sistèma d'accès; en apartat 4, eth nivèu de titolacion exigida entà accedir-i; en apartat 5, eth cors selectiu eliminatòri; en apartat 6, eth torn de promocion intèrna, e en apartat 7, eth nivèu inferior de complement de destinacion.

Article unic. Modificacion dera Lei 16/2014

Se hig ua disposicion addicionau, era tresau, ara Lei 16/2014, de 4 de deseme, d'accion exteriora e de relacions damb era Union Europèa, damb eth tèxte següent:

«Tresau. Creacion deth Còs d'Accion Exteriora e Union Europèa dera Generalitat de Catalonha

»1. Se cree eth Còs d'Accion Exteriora e Union Europèa dera Generalitat de Catalonha, laguens deth grop de classament A, subgrop A1, adscrit ath departament competent en matèria d'accion exteriora e Union Europèa.

»2. Es foncions pròpries deth Còs d'Accion Exteriora e Union Europèa, en quadre des competéncies en encastre des relacions damb era Union Europèa e dera accion exteriora atribuïdes ara Generalitat per Estatut d'autonomia de Catalonha, son es següentes:

»a) Participar ena projeccion de Catalonha en exterior e ena promocion des sòns interèssi en aguest encastre.

»b) Facilitar er establiment e era mantenença des relacions damb govèrns e es sòns representants en exterior, institucions dera Union Europèa, organismes internacionaus e hilats de cooperacion territoriau e sectoriau, e participar ena elaboracion, era adopcion e era aplicacion d'acòrds de collaboracion.

»c) Examinar e avalorar es actes de conclusion e de revision des tractats internacionaus e dera Union Europèa qu'afècten d'ua faiçon dirècta e singulara es competéncies dera Generalitat, e hèr costat ena preparacion des observacions pertinentes e en seguiment dera execucion des obligacions derivades des tractats e convènis internacionaus.

»d) Collaborar ena preparacion dera participacion dera Generalitat enes organismes internacionaus competents en matèries d'interès entà Catalonha, e enes organismes bilateraus e multilateraus de cooperacion damb er Estat enes ahèrs restacadi damb era Union Europèa.

»e) Assistir tecnicament e informar sus es ahèrs internacionaus e es ahèrs restacadi damb era Union Europèa qu'afècten es competéncies o es interèssi de Catalonha.

»f) Elaborar rapòrts, estudis, analisis, posicionaments e avaloracions restacadi damb es competéncies o es interèssi de Catalonha en encastre dera accion exteriora e des relacions damb era Union Europèa.

»g) Participar ena definicion des objectius, ena elaboracion dera regulacion des convocacions e des programes de finançament promoigudi pera Union Europèa, e en dessenh, era aplicacion e era gestion de projèctes europèus e internacionaus.

»h) Assistir tecnicament es entitats locaus, es organismes e d'autes entitats publiques de Catalonha ena projeccion internacionau e hèr-les costat en aguest encastre.

»i) Collaborar ena promocion dera projeccion internacionau des organizacions sociaus, sindicaus, juveniles, culturaus, esportives e deth teishut economic e empresariau de Catalonha, e ena promocion dera sua afiliacion as entitats pariones d'encastre internacionau.

»j) Assistir tecnicament ena planificacion, execucion e avaloracion dera politica de cooperacion ath desvolopament e d'accion umanitària.

»k) Participar ena coordinacion e gestion dera representacion institucionau dera Generalitat en exterior e collaborar ena definicion e aplicacion de mecanismes entà hèr costat as ciutadans e as comunitats catalanes en exterior.

»l) Es que deriven des foncions anteriores o i siguen restacades.

»3. Er ingrès en Còs d'Accion Exteriora e Union Europèa se hè per mejan deth sistèma de concors oposicion, en torns d'accès liure e de promocion intèrna.

»4. Entà accedir ath Còs d'Accion Exteriora e Union Europèa, cau èster en possession d'ua titolacion oficiau de nivèu universitari de doctorat, grad, licenciatura, arquitectura o engenharia o de d'autes titolacions equivalentes. Cau acreditar tanben coneishements de lengua anglesa de nivèu C1 o superior deth Quadre europèu comun de referéncia entàs lengües, e coneishements, aumens, de ua auta lengua, que s'a de concretar enes bases dera convocacion corresponenta.

»5. Ena convocacion d'accès ath Còs d'Accion Exteriora e Union Europèa se pòt establir un cors selectiu eliminatòri de caractèr practic.

»6. Es convocacions d'accès ath Còs d'Accion Exteriora e Union Europèa an de garantir un torn de promocion intèrna, en tot respectar es principis d'igualtat, merit e capacitat, en quau an dret a participar:

»a) Eth personau foncionari des còssi, escales o especialitats deth grop A, sosgrop A1, dera Generalitat de Catalonha que complisque es requisits de titolacion e es condicions qu'establís era normativa generau en matèria de promocion intèrna.

»b) Eth personau laborau fix que, en moment qu'entre en vigor era lei que modifique era present lei entà crear eth Còs d'Accion Exteriora e Union Europèa, exercisque es sues foncions en matèria d'accion exteriora e Union Europèa segontes se definissen en aguesta lei en departament competent en matèria d'accion exteriora e Union Europèa, o en quinsevolh des sues entitats publiques, adscrites, restacades o depenentes, a condicion qu'age era titolacion de besonh e complisque es auti requisits.

»As efèctes de çò qu'establís aguest apartat, s'an d'avalorar coma merit es servicis efectius prestadi coma foncionari o personau laborau fix.

»7. Eth nivèu inferior de complement de destinacion que s'a d'assignar ath Còs d'Accion Exteriora e Union Europèa ei eth 23. A compdar d'aguest nivèu, es lòcs de trabalh s'an de classar e avalorar de conformitat damb era legislacion dera foncion publica aplicabla ara Administracion dera Generalitat, e damb es acòrds artenhudi enes taules negociadores corresponentes damb era representacion sindicau des trabalhadors dera Generalitat de Catalonha, a trauès des taules de negociacion dera Administracion dera Generalitat e es espacis de concertacion sociau.»

Disposicions finaus

Prumèra. Desplegament reglamentari

S'autorize ath Govèrn entà dictar es disposicions reglamentàries de besonh entà aplicar e desplegar aguesta lei. Tot desplegament reglamentari en matèria de condicions de trabalh, especiaument es convocacions referentes a mobilitat, accès e provision de lòcs de trabalh, s'an de negociar damb es sindicats mès representatius ena Generalitat de Catalonha.

Dusau. Afectacion pressupostària

Es precèptes que compòrten despenes damb cargue as pressupòsti dera Generalitat produsissen efèctes a compdar dera entrada en vigor dera lei de pressupòsti corresponenta ar exercici pressupostari immediatament posterior ara entrada en vigor d'aguesta lei.

Tresau. Entrada en vigor

Aguesta lei entre en vigor ath cap de vint dies d'auer estat publicada en Diari Oficial de la Generalitat de Catalunya.

Per tant, ordeni a toti es ciutadans as quaus sigue d'aplicacion aguesta Lei coopèren ath sòn compliment e qu'es tribunaus e es autoritats as quaus pertòque la hèsquen complir.

Palai dera Generalitat, 21 de mai de 2025

Salvador Illa i Roca

President dera Generalitat de Catalonha"