Parlament de Catalunya - Disposiciones generales (DOGC nº 2023-8942)

De conformidad con lo dispuesto por el artículo 6.5 del Estatuto de autonomía de Cataluña; el artículo 4 de la Ley 2/2007, de 5 de junio, del Diari Oficial de la Generalitat de Catalunya, y el artículo 7 de la Ley 35/2010, de 1 de octubre, del occitano, aranés en Arán, la Mesa del Parlament, en la sesión celebrada el día 13 de junio de 2023, ha aprobado la versión en occitano, en variedad aranesa, de la Ley 9/2023, de 19 de mayo, de medidas extraordinarias y urgentes para afrontar la situación de sequía excepcional en Cataluña, aprobada por el Pleno del Parlament en la sesión celebrada el día 4 de mayo de 2023 y publicada en el Butlletí Oficial del Parlament de Catalunya número 580, del 19 de mayo de 2023, y en el Diari Oficial de la Generalitat de Catalunya número 8920, del 22 de mayo de 2023, cuyo texto se reproduce a continuación, a efectos de su publicación en el Diari Oficial de la Generalitat de Catalunya e inclusión del número y la fecha de la ley publicada, así como la fórmula de promulgación.

Palacio del Parlament, 13 de junio de 2023

Aurora Madaula i Giménez

Secretaria segunda

Anna Erra i Solà

Presidenta

"LEI 9/2023, DETH 19 DE MAI, DE MESURES EXTRAORDINÀRIES E URGENTES ENTÀ AFRONTAR ERA SITUACION DE SEQUÈRA EXCEPCIONAU EN CATALONHA.

Eth president dera Generalitat de Catalonha

Es articles 65 e 67 der Estatut preven qu'es leis de Catalonha son promulgades, en nòm deth rei, peth president o presidenta dera Generalitat. Cossent damb çò precedent promulgui era següenta

LLEI

Preambul

Era sequèra ei un efècte mès dera emergéncia climatica globau ena quau Catalonha ei immergida e ei un rèpte de país préner decisions fèrmes entà impulsar es mesures concrètes qu'ajuden a mitigar-ne es efèctes.

Eth Decrèt lei 1/2023, deth 28 de hereuèr, peth quau s'establissen mesures extraordinàries e urgentes entà hèr tèsta ara situacion de sequèra excepcionau en encastre deth districte de conca fluviau de Catalonha, aprovat peth Govèrn, non dispòse qu'era contractacion des inversions urgentes se pogue hèr peth tramit d'urgéncia, tau coma se hec pendent era pandèmia de covid, ne fixe ua moratòria en regim sancionador enes ajuntaments. Tanpòc non garantís es inversions mès urgentes e de besonh entà ajudar as ajuntaments e tirar entà deuant projèctes clau e mesures especiaus entàs sectors especiaument afectadi, coma es explotacions agricòles e ramadères deth país.

Es episòdis de sequèra an d'interpellar, implicar e esperoar a toti, tant as administracions coma ara societat, a arténher compromisi concrèts e cercar solucions a cuert, mejan e long termini a compdar des consensi, era cooperacion e eth trabalh conjunt, damb dialòg e responsabilitat.

Article 1. Objècte

Aguesta lei a per objècte establir es normes e es mesures extraordinàries e urgentes entà afrontar era situacion de sequèra excepcionau en Catalonha, e tanben complementar eth Decrèt lei 1/2023, deth 28 de hereuèr, peth quau s'establissen mesures extraordinàries e urgentes entà hèr tèsta ara situacion de sequèra excepcionau en encastre deth districte de conca fluviau de Catalonha, pr'amor qu'es administracions competentes en servici de provediment d'aigua poguen, d'un costat, profitar es recorsi idrics de tot eth territòri catalan e garantir era prestacion apropriada des servicis deth cicle dera aigua, especiaument, eth provediment domiciliari d'aigua apta entath consum uman, e, der aute, planificar es inversions urgentes e abilitar-ne era execucion peth tramit d'emergéncia.

Article 2. Tramitacion d'emergéncia des òbres e accions prioritàries

1. Es expedients de contractacion d'òbres, subministraments e servicis que se tramiten en aplicacion deth Decrèt lei 1/2023 e d'aguesta lei, pes quaus s'establissen mesures extraordinàries e urgentes entà afrontar era situacion de sequèra excepcionau en tot eth territòri de Catalonha, enes encastres declaradi en situacion d'excepcionalitat e d'emergéncia pòden èster objècte de tramitacion d'emergéncia as efèctes de çò que dispòse er article 120 dera Lei der Estat 9/2017, deth 8 de noveme, de contractes deth sector public, pera quau se transpausen ar ordenament juridic espanhòu es directives deth Parlament Europèu e deth Conselh 2014/23/UE e 2014/24/UE, deth 26 de hereuèr de 2014.

2. Es òbres e accions que cònsten en Decrèt lei 1/2023 e enes annèxes d'aguesta lei son urgentes e prioritàries, e pòden èster objècte de contractacion peth procediment que fixe er apartat 1 e executades pes administracions competentes en servici de provediment.

3. Eth procediment de contractacion d'emergéncia que dispòse er apartat 1 e eth caractèr d'urgéncia e prioritat des òbres e accions qu'establís er apartat 2 s'apliquen a toti es expedients de contractacion d'òbres, subministraments, assisténcies e accions de besonh entà afrontar era situacion de sequèra excepcionau.

4. Es òbres e accions des encastres declaradi en situacion d'excepcionalitat e d'emergéncia pòden èster executades pes operadors restacadi ara gestion dera aigua o pes entitats gestores des servicis de provediment, damb era autorizacion prèvia des ajuntaments.

5. Era Secretaria Tecnica dera Junta Consultativa de Contractacion Publica a de redigir, quan age acabat eth periòde de sequèra, un repòrt finau qu'a d'includir ua lista de totes es òbres e autes accions prioritàries que s'an licitat, eth còst qu'an agut entara Administracion e era utilitat qu'an aportat.

Article 3. Aportacions economiques, gestion de recorsi e tramitacion d'autorizacions dera Agéncia Catalana dera Aigua

1. Era Agéncia Catalana dera Aigua a d'assumir, damb caractèr extraordinari, es còsti derivadi dera adequacion, eth melhorament o era installacion d'elements de contròl e gestion des recorsi idrics disponibles en miei, coma tanben es installacions, òbres e accions urgentes e prioritàries que corresponen as entitats locaus coma conseqüéncia des disposicions qu'eth Govèrn apròve entà afrontar era situacion de sequèra excepcionau. Es accions tanben pòden èster finançades damb cargue a fons estataus e europèus.

2. Es dotacions entà afrontar es despenes derivades d'amiar a tèrme es òbres e accions prioritàries pes situacions d'excepcionalitat e d'emergéncia que non se poguen finançar damb cargue as credits pressupostaris disponibles deth pressupòst en vigor s'an d'autorizar per mejan d'un o diuèrsi acòrds de govèrn. Aguesti acòrds an d'especificar es impòrts maximaus e es transferéncies de credit que s'autorizen entath finançament.

3. Era Agéncia Catalana dera Aigua gestione es recorsi abilitadi, sens perjudici dera participacion des departaments competents en matèria d'assisténcia as entitats locaus entà balhar servicis de qué son titulars. Es accions que s'an d'amiar a tèrme s'an de regular mejançant convènis, qu'an d'especificar er organ o era entitat responsabla des accions o es servicis, eth regim de cofinançament e es condicions de gestion.

4. Era Agéncia Catalana dera Aigua a d'abilitar es recorsi de besonh entà tramitar urgentament es sollicituds d'autorizacion a fin de méter en foncionament captacions existentes entath provediment d'encastre locau e entà amiar a tèrme accions immediates destinades a agranir e melhorar es provediments d'aigua, recuperar provediments en desusatge, connectar-se ath hilat de provediment e, en generau, adoptar mesures encaminades a afrontar era situacion de sequèra.

Disposicions addicionaus

Prumèra. Abilitacion de recorsi economics addicionaus entà òbres e accions urgentes e prioritàries

1. Eth Govèrn, a prepausa deth departament competent en matèria d'accion climatica, alimentacion e agenda rurau, a d'abilitar era dotacion pressupostària damb caractèr extraordinari entà corbir es còsti des òbres e accions urgentes e des que detalhe er annèxe 2, sens perjudici que se financen damb cargue a fons estataus e europèus.

2. Eth Govèrn a d'impulsar es granes infraestructures que detalhe er annèxe 2, sens perjudici des inversions de besonh que poguen sorgir.

3. Eth Govèrn a d'impulsar, entath melhorament des recorsi idrics, ajudes as entitats locaus per un impòrt de 50 milions d'èuros des pressupòsti dera Generalitat, pr'amor qu'amien a tèrme es inversions de besonh entà melhorar es captacions, es depòsits e eth rendiment des sòns hilats de subministrament d'aigua en nauta de titularitat municipau e baisha e, especiaument, entà sectorizar es hilats, digitalizar eth servici, implantar reguladors de pression, sistèmes de telelectura e debitmètres, e tanben entà recuperar potzi existenti, bastir-ne de naui e incrementar eth nombre de tractaments d'osmòsi invèrsa.

4. Eth Govèrn a d'aportar 50 milions d'èuros entà inversions dera Entitat de Provediment d'Aigua Ter-Llobregat en reposicions e melhores, especiaument enes accions que detalhe er annèxe 2, a fin d'actualizar eth hilat de tractament, d'embassament, de distribucion e de subministrament d'aigua e garantir era mantenença posteriora corresponenta de tot eth hilat d'aigua de Catalonha entà assegurar-ne eth foncionament corrècte e era eficiéncia, sens perjudici des inversions en òbres e accions que siguen urgentes e de besonh e que poguen sorgir.

5. Era Agéncia Catalana dera Aigua a d'amiar a tèrme es accions següentes:

a) Abilitar ua linha de subvencions adreçades as entitats locaus, de 6 milions d'èuros, entath bastiment de naui tractaments de regeneracion, canoades de distribucion e infraestructures que li son de besonh, sens perjudici des inversions en òbres e accions que siguen urgentes e de besonh e que poguen sorgir.

b) Assumir es còsti d'espleitacion derivadi dera metuda en marcha de plantes de regeneracion, valoradi en 8 milions d'èuros annaus, enes tèrmes qu'establís er article 55 bis deth tèxte rehonut dera legislacion en matèria d'aigües de Catalonha, aprovat peth Decrèt legislatiu 3/2003, deth 4 de noveme.

c) Crear ua partida extraordinària de 20 milions d'èuros entà méter en marcha es plantes de regeneracion que non son en foncionament e bastir es hilats de distribucion des que òc qu'ac son, tostemp d'acòrd damb es administracions locaus corresponentes.

d) Crear ua partida extraordinària de 30 milions d'èuros entàs inversions que detalhe er annèxe 2.

e) Establir ua linha de finançament entàs municipis pr'amor que redigisquen es plans d'emergéncia municipau en situacions de sequèra.

Dusau. Plan de chòc de supòrt ara activitat agrària e abilitacion des recorsi economics extraordinaris de besonh

1. Eth Govèrn, per mejan deth departament competent en matèria d'accion climatica, alimentacion e agenda rurau, a de dessenhar, en un periòde maximau d'un mes a compdar dera data d'aprobacion d'aguesta lei, un plan d'accion de supòrt ara activitat agrària, qu'a d'incorporar mesures entà garantir era subervivença des explotacions agricòles e ramadères deuant era gravetat dera afectacion provocada pera situacion de sequèra e priorizar es accions següentes:

a) Establir ua linha d'ajudes dirèctes entàs sectors agraris e pagesi a fin de compensar es pèrtes produsides pes restriccions.

b) Establir ua linha de prèsti bonificadi per part der Institut Catalan de Finances entà garantir era continuïtat des campanhes futures.

c) Estudiar un despartiment dera igua mès equitatiu entre eth sector agrari e era rèsta de sectors economics.

2. Eth Govèrn a d'abilitar era dotacion pressupostària extraordinària de besonh entà amiar a tèrme eth plan d'accion a qué hè referéncia er apartat 1.

Disposicions finaus

Prumèra. Modificacion deth Plan especiau d'accion en situacion d'alèrta e eventuau sequèra

1. Se modifique era letra e deth subapartat 2 der apartat 4 deth capítol 5, relatiu as limitacions particulares en usatge d'aigua entath provediment de poblacion en fasa d'alèrta, deth Plan especiau d'accion en situacion d'alèrta e eventuau sequèra, aprovat per Acòrd GOV/1/2020, deth 8 de gèr, que demore redigida dera manèra següenta:

«e) Era utilizacion d'aigua entar aumpliment de piscines demore limitada as cassi següents:

»- Eth reaumpliment parciau de piscines que dispòsen d'un sistèma de recirculacion dera aigua, enes quantitats indispensables entà replaçar es pèrtes d'aigua per evaporacion e neteja de filtres e entà garantir era qualitat sanitària dera aigua.

»- Eth prumèr aumpliment de piscines de nau bastiment o er aumpliment que respone a òbres de reabilitacion dera piscina o de modificacion deth vas.

»- En centres educatius, er aumpliment complèt o parciau de piscines desmontables de capacitat inferiora a 500 litres destinades ath banh de mainatges.

»Aguestes limitacions non s'apliquen as piscines d'aigua de mar que s'aumplisquen e se ueden sense connexion as hilats de provediment e d'assaniment publics.»

2. Se modifique era letra c deth subapartat 2 der apartat 5 deth capítol 5, relatiu as limitacions particulares en usatge d'aigua entath provediment de poblacion en fasa d'excepcionalitat, deth Plan especiau d'accion en situacion d'alèrta e eventuau sequèra, aprovat per Acòrd GOV/1/2020, deth 8 de gèr, que demore redigida dera manèra següenta:

«c) Era utilizacion d'aigua entar aumpliment de piscines demore limitada as cassi següenti:

»- Eth reaumpliment parciau de piscines que dispòsen d'un sistèma de recirculacion dera aigua, enes quantitats indispensables entà garantir era qualitat sanitària dera aigua.

»- Enes piscines d'usatge public, definides en article 2.2 deth Reiau decrèt 742/2013, deth 27 de seteme, peth quau s'establissen es critèris tecnicosanitaris des piscines, o enes piscines d'usatge privat de tipe 3A, definides en article 2.3.a deth dit Reiau decrèt, eth prumèr aumpliment de piscines de nau bastiment o er aumpliment que respone a òbres de reabilitacion dera piscina o de modificacion deth vas.

»- En centres educatius, er aumpliment complèt o parciau de piscines desmontables de capacitat inferiora a 500 litres destinades ath banh de mainatges.

»- Enes piscines des installacions juveniles inscrites en Registre d'Installacions Juveniles dera Direccion Generau de Joenessa.

»Aguestes limitacions non s'apliquen as piscines d'aigua de mar que s'aumplisquen e se ueden sense connexion as hilats de provediment e d'assaniment publics.»

3. Aguesta modificacion deth Plan especiau d'accion en situacion d'alèrta e eventuau sequèra manten eth reng der Acòrd GOV/1/2020, deth 8 de gèr.

Dusau. Abilitacion pressupostària

Es precèptes que compòrten despenes damb cargue as pressupòsti dera Generalitat produsissen efèctes a compdar dera entrada en vigor dera lei de pressupòsti corresponenta ar exercici pressupostari immediatament posterior ara entrada en vigor d'aguesta lei. Totun, eth Govèrn a d'abilitar es partides pressupostàries e es recorsi de besonh e sufisents entà efectuar es despenes e inversions qu'aguesta lei establís que s'an d'amiar a tèrme o iniciar en exercici deth 2023.

Tresau. Entrada en vigor

Aguesta lei entre en vigor londeman d'auer estat publicada en Diari Oficial de la Generalitat de Catalunya, exceptat deth regim sancionador establit en apartat 1.b, d, e e g e es apartats 2 e 3 der article 29 bis deth tèxte rehonut dera legislacion en matèria d'aigües de Catalonha, aprovat peth Decrèt legislatiu 3/2003, deth 4 de noveme, qu'entre en vigor ath cap d'un mes dera data de publicacion dera orde de convocatòria dera linha d'ajudes a qué hè referéncia er apartat 3 dera disposicion addicionau prumèra.

Annèxe 1. Tipologies d'accions entà executar peth procediment d'emergéncia

1. Melhorament dera garantia per mejan dera intensificacion deth contròl deth recors e dera demanda

a) Bastiment, reabilitacion o melhorament de punts de contròl, telecomandes e compdadors.

b) Melhorament o reabilitacion des installacions e es equipaments deth hilat de contròl deth sistèma integrau deth cicle dera aigua en territòri (SICAT) dera Agéncia Catalana dera Aigua.

c) Intensificacion des activitats d'intervencion administrativa d'usatges e abocaments.

d) Intensificacion dera operacion de sistèmes de telecontròl, analisi e prevision.

e) Intensificacion deth contròl dera qualitat dera aigua enes restanques de regulacion de hilats de provediment.

f) Intensificacion deth contròl dera qualitat dera aigua e solucion de problèmes en arrius e aqüifèrs.

g) Caracterizacion analitica de recorsi idrics susceptibles d'èster potabilizadi. Intensificacion deth contròl des captacions e deth regim de cabaus de mantenença per mejan de mesuratges.

h) Implantacion o melhorament de sistèmes de contròl e monitoratge des captacions entà hèr un seguiment melhor dera evolucion des nivèus piezometrics e es cabaus extrèti.

i) Modèls de prevision e melhorament dera gestion des recorsi superficiaus e sosterranhs.

2. Melhorament dera garantia de provediment per mejan d'accions infraestructuraus

a) Òbres de melhorament dera connectivitat des hilats de provediment.

b) Òbres o accions entà melhorar o ampliar era qualitat deth recors idric o des procèssi de tractament dera aigua.

c) Òbres o accions entà obtier o generar un nau recors o melhorar era disponibilitat deth recors existent, includida era eliminacion de nutrients.

d) Òbres o accions de melhorament dera eficiéncia des infraestructures d'adaiguatge en sistèmes d'usatges compartidi entre provediment e adaiguatge.

e) Òbres o accions de reutilizacion damb caractèr estrategic que libèren, d'ua manèra significativa, un recors procedent de sistèmes reguladi entà hilats de provediment.

f) Òbres o accions de gestion de sediments enes restanques entà aumentar-ne era capacitat de regulacion.

g) Òbres o accions entath profitament des volums des restanques per jos des còtes de captacion existentes.

3. Emergéncia en provediment

a) Installacion de mecanismes automatics de gestion dera demanda (reguladors de pression).

b) Renauiment des hilats de distribucion d'aigua en mau estat entà redusir pèrtes d'aigua.

c) Òbres o accions entara recuperacion de potzi en desusatge.

d) Reabilitacion de depòsits entà evitar pèrtes d'aigua.

e) Òbres o accions entà sectorizar es hilats de provediment d'aigua.

f) Bastiment de naui punts alternatius de provediment entar usatge domestic e infraestructures auxiliares.

g) Transpòrt d'emergéncia d'aigua entath provediment.

h) Òbres e accions associades ara substitucion d'usatges o de recorsi.

i) Equipes entà detectar pèrtes e fraus.

Annèxe 2. Accions d'emergéncia e prioritàries relatives ath provediment d'aigua ena region metropolitana

1. Granes infraestructures

a) Licitacion, abans deth mes de junhsèga deth 2023, e execucion des òbres d'agraniment dera dessalinizadora dera Tordera.

b) Finalizacion, pendent eth 2023, deth projècte e era òbra d'agraniment dera estacion de tractament d'aigua potabla deth Besòs e des naues captacions sosterranhes e superficiaus.

c) Ampliament deth tractament d'osmòsi invèrsa enes potzi Estrella.

d) Redaccion deth projècte abans deth 2023 e licitacion e execucion des òbres d'ua dessalinizadora ena zòna de Cubelles (installacion de tractament d'aigua marina deth Foix).

e) Execucion prioritària e urgenta des inversions aprovades enes pressupòsti dera Generalitat de Catalonha entath 2023:

- Agraniment dera estacion de tractament d'aigua potabla deth Besòs.

- Bastiment d'ua estacion de regeneracion d'aigua en Besòs.

f) Garantiment deth tractament deth cabau d'aigües sosterranhes de Sant Joan Despí.

g) Increment des tractaments d'osmòsi invèrsa dera estacion de tractament d'aigua potabla de Sant Joan Despí (+ 2 m3/s).

h) Bastiment de potzi enquia 4 m3/s ena estacion de tractament d'aigua potabla de Sant Joan Despí (+ 1,3 m3/s).

i) Accions entà evitar era entrada d'aigua de mar en sistèma d'assaniment dera estacion depuradora d'aigües residuaus deth Prat de Llobregat.

j) Bastiment d'un parc fotovoltaic de 100 MW entara naua installacion de dessalinizacion d'aigua de mar Tordera 2.

2. Infraestructures dera Entitat de Provediment d'Aigua Ter-Llobregat

a) Desdoblament deth tram 4 dera artèria PTT-EDT 2 de besonh entà eliminar es pèrtes.

b) Adaptacion dera capacitat de produccion e optimizacion dera qualitat de tractament dera estacion de tractament d'aigua potabla deth Llobregat, gestionada pera Entitat de Provediment d'Aigua Ter-Llobregat e plaçada en Abrera.

c) Adaptacion dera capacitat de produccion e optimizacion dera qualitat de tractament dera estacion de tractament d'aigua potabla deth Ter, gestionada pera Entitat de Provediment d'Aigua Ter-Llobregat e plaçada en Cardedeu.

3. Inversions entara regeneracion d'aigua

a) Ampliament deth profitament ena estacion de regeneracion d'aigua de Sant Feliu de Llobregat.

b) Ampliament des tractaments biologics dera estacion depuradora d'aigües residuaus deth Prat de Llobregat entà redusir nutrients.

c) Bastiment d'un hilat de distribucion ena estacion de regeneracion d'aigua de Sabadell, entà usatges municipaus e auti usatges en Sabadell, Cerdanyola del Vallès e Sant Cugat del Vallès.

d) Traspàs d'aigües residuaus dera conca deth Besòs ara conca deth Llobregat.

Per tant, ordeni a toti es ciutadans as quaus sigue d'aplicacion aguesta Lei coopèren ath sòn compliment e qu'es tribunaus e es autoritats as quaus pertòque la hèsquen complir.

Palai dera Generalitat, 19 de mai de 2023

Pere Aragonès i Garcia

President dera Generalitat de Catalonha"