A Xunta pon a disposición de veciños, turistas e peregrinos a humanizada praza do Souto de Valga

Valga (Pontevedra), 26 de xullo de 2024

O director de Turismo de Galicia, Xosé Merelles, visitou esta tarde as obras de remodelación realizadas por Turismo de Galicia na Praza do Souto, en Valga (Pontevedra), que posibilitaron converter este espazo "nun lugar máis accesible, seguro e cómodo para todos".

Logo da visita, Xosé Merelles, destacou que a actuación acometida, na que se investiron 240.000 euros, permitiu humanizar a praza "non só para o goce dos veciños de Valga senón tamén para os visitantes deste concello e para os peregrinos que cada día percorren o Camiño Portugués", que transcorre por diferentes emprazamentos deste municipio".

Ademais, segundo puxo de manifesto o director de Turismo de Galicia, as obras realizadas, contribúen a reforzar o potencial turístico do municipio e mellorar a seguridade e accesibilidade de veciños, visitantes e peregrinos.

Xosé Merelles salientou a aposta que fai o Goberno galego por poñer en valor estes elementos patrimoniais que suman atractivo a oferta de turismo cultural relacionada co Camiño e que contribúen ao desenvolvemento económico de contornas do rural galego.

"Esta actuación -engadiu- permítenos potenciar un elemento patrimonial do concello, fomentando este tipo de turismo como un instrumento de reequilibrio territorial e  dinamización económica, especialmente, nun municipio polo que transcorre o Camiño Portugués, que, nestes momentos, é o segundo itinerario máis percorrido polos peregrinos". No que vai de ano, máis de 50.000 persoas realizaron xa este itinerario, o que supón un incremento do 8%.