A Xunta e o Colexio de Enxeñería en Informática de Galicia inician as xornadas de robótica para nenos ingresados nos hospitais públicos
Estas imágenes pertenecen a xunta.gal
- Estas actividades realízanse no marco do convenio de colaboración asinado entre ambas as partes, que prevé a realización de 14 obradoiros, 2 en cada área sanitaria
- O Servizo Galego de Saúde destina 11.500 euros para adquirir o equipamento co que impartir os talleres con robots
- Os obradoiros contan coa colaboración de grandes empresas do ámbito tecnolóxico galego que achegan a súa experiencia e recursos para o éxito das actividades
- As seguintes xornadas nas demais áreas sanitarias están previstas para os meses de outubro e de decembro
Santiago de Compostela, 17 de xullo de 2024
A Xunta e o Colexio Profesional de Enxeñería en Informática de Galicia iniciaron hoxe as xornadas de robótica nos hospitais públicos galegos co fin de humanizar a estancia dos nenos ingresados.
O conselleiro de Sanidade, Antonio Gómez Caamaño, xunto co presidente do Colexio Profesional de Enxeñería en Informática de Galicia, Fernando Súarez, o xerente da área sanitaria de Santiago e Barbanza, Ángel Facio, e o subdirector xeral de Sistemas e Tecnoloxías da Información da Consellería de Sanidade, Benigno Rosón, inauguraron esta tarde a primeira xornada de formación en robótica no Hospital Clínico Universitario de Santiago de Compostela.
Este é o primeiro dunha serie de obradoiros de actividades interactivas e prácticas que se realizan ao abeiro do convenio de colaboración asinado entre o Servizo Galego de Saúde e o Colexio Profesional de Enxeñería en Informática de Galicia para a mellora da saúde emocional e mental dos nenos e nenas hospitalizados.
A Xunta achega unha axuda de 11.500 euros para a adquisición do equipamento necesario para realizar os obradoiros, cos que se pretenden reducir o estrés que sofren os nenos e nenas durante os períodos de hospitalización, facendo máis agradable e amable a súa estancia e favorecendo así a súa recuperación.
Neste primeiro obradoiro, as actividades foron impartidas por voluntarios do Centro de Investigación en Tecnoloxías da Información e as Comunicacións (CITIC) da Universidade da Coruña, contando coa colaboración doutras empresas recoñecidas no sector tecnolóxico galego como Bahía Software, H3C, Telefónica, Balidea, NTT Data e HPE.
As xornadas continuarán nas demais áreas sanitarias nos meses de outubro e decembro, estando prevista a realización dun total de 14 obradoiros, dous por cada área sanitaria ao ano.