A Xunta destina máis de 19 M€ á mellora de camiños rurais, con 583 actuacións nos concellos galegos
Estas imágenes pertenecen a xunta.gal
- María José Gómez fixo balance das actuacións realizadas arredor desta iniciativa no municipio de Carballedo, que contou cun orzamento de preto de 90.000€ a pasada convocatoria e tamén recibirá unha axuda similar para o período 2024-2025
- A titular de Medio Rural destacou a importancia do Plan de mellora de camiños rurais para impulsar as infraestruturas e conseguir así a fixación da poboación e a dinamización do tecido produtivo
- Hoxe publicouse no Diario Oficial de Galicia a resolución das subvencións concedidas ao abeiro deste Plan da convocatoria actual
Carballedo (Lugo), 16 de xullo de 2024
A conselleira do Medio Rural, María José Gómez, acompañada polo alcalde do concello de Carballedo, Julio Yebra-Pimentel, visitou hoxe esta localidade lucense e salientou alí, concretamente no lugar de Fufín, as actuacións realizadas ao abeiro do Plan de mellora de camiños rurais, coñecido como Plan Marco, a través dunha axuda de preto de 90.000€ da convocatoria 2023-2024. A provincia de Lugo recibiu nesta un importe de máis de 4,4 millóns de euros e melloráronse así máis de 150 quilómetros.
Para este ano, a totalidade do orzamento do Plan ascende a case 19,5 millóns de euros, o que supón a cantidade máis alta dende 2017. Cómpre salientar que hoxe publicouse no Diario Oficial de Galicia a resolución das subvencións concedidas na convocatoria actual, de 2024-2025, benefician a 583 camiños e máis de 460 quilómetros. Unha cantidade de preto de 90.000€ destinarase á mellora de camiños no municipio de Carballedo, na parroquia de Lobelle, nos lugares de Quintela, Vilar de Mulleres e Lobelle de Arriba. O financiamento faise con fondos Feader, con cargo ao Plan Estratéxico da PAC 2023-2027 e son subvencionables camiños de acceso a núcleos rurais de poboación.
O obxectivo do Plan de mellora de camiños rurais é mellorar as condicións de vida e traballo no medio rural xa que o fortalecemento das infraestruturas facilita a accesibilidade e vertebración do territorio, reforza o tecido social, contribúe a mellorar a capacidade organizativa das áreas rurais, dinamiza o tecido produtivo e fixa a poboación. Nesta liña, estas axudas promoven a implantación e reforzo dos servizos demandados pola poboación e o tránsito de vehículos e maquinaria, o que redunda nunha maior axilidade dos traballos agrarios e no mantemento e bo estado, tamén, da propia maquinaria.
Máis de 5.450 camiños mellorados dende 2016
Durante o período 2016-2024, o Plan Marco contou cunha dotación orzamentaria de máis de 130 millóns de euros, permitindo a mellora de máis de 5.450 camiños e máis de 4.280 quilómetros de vías rurais.
María José Gómez destacou que dende a Consellería seguen a reforzar esta iniciativa pola súa utilidade e defendeu a medida que "mellora as dotacións existentes de infraestruturas básicas e enmárcase no compromiso de promoción e coordinación do desenvolvemento do territorio rural galego". A súa traxectoria remóntase a 2013 e este ano, por primeira vez, compleméntase co Plan de rehabilitación de camiños de zonas de concentración ou reestruturación parcelaria finalizadas, dotado con 6 millóns de euros.
En cada convocatoria do Plan repártense entre os concellos galegos os fondos dispoñibles e corresponde a cada un deles a elección dos camiños sobre os que se considera preciso actuar, así como o proxecto de obra de ampliación, mellora ou mantemento. Ademais, estes están obrigados a contratar un servizo externo de control de calidade das obras executadas.
Ligazón á resolución no DOG:
https://www.xunta.gal/dog/Publicados/2024/20240717/AnuncioO90-100724-0001_gl.html