Ana Ortiz destaca a promoción do Bono Turístico da Xunta con doce establecementos adheridos en Vigo
![Imagen del artículo Ana Ortiz destaca a promoción do Bono Turístico da Xunta con doce establecementos adheridos en Vigo](https://govclipping.com/uploads/images/104145-govclipping-espana-galicia-notas-prensa.webp)
Estas imágenes pertenecen a xunta.gal
- A delegada territorial en Vigo visitou este luns unha das axencias de viaxes que forman parte da nova campaña de Turismo de Galicia
- Os bonos, dos cales máis de 15.000 xa foron descargados por usuarios, poderán desfrutarse en estadías en Galicia do 10 de setembro ao 25 de decembro
Vigo, 15 de xullo de 2024
A delegada territorial da Xunta de Galicia en Vigo, Ana Ortiz, acudiu este luns á axencia de viaxes Bivestour, un dos establecimentos adheridos dentra da oferta do Bono Turístico posta en marcha polo Goberno galego. Na visita a delegada lembrou que quedan xa poucos bonos dispoñibles tras o éxito da descarga desde o inicio da campaña o pasado 4 de xullo. Os usuarios que desexen descargar o bono turístico da Xunta este 2024 poden facelo a través da páxina web www.bonoturismo.gal.
"A iniciativa estase a consolidar como unha proposta que impulsa a actividade fóra de tempada alta e contribúe a apoiar o sector e con ela o Goberno autonómico busca promover as viaxes en Galicia durante este outono", sinalou Ortiz. Segundo explicou, polo de agora hai máis de 300 establecementos de aloxamento e axencias nos que poder desfrutar do bono dos que máis de 80 están na provincia de Pontevedra e 12 na cidade de Vigo. Os aloxamentos aínda teñen de prazo para sumarse ata o 2 de decembro.
Pola súa banda, os beneficiarios poderán empregar os seus bonos desde o 10 de setembro ata o 25 de decembro de 2024, ambos incluídos. Como novidade, cada usuario poderá descargar este ano ata dous bonos, polo que poderá contar cun investimento de ata 300€ para gozar dunha estadía o vindeiro outono nalgún dos establecementos que se adhiran.
O Goberno autonómico inviste este ano 1M€ coa previsión de mobilizar no sector 2,5M€ durante o outono. Poranse en circulación máis de 16.000 bonos en formato código QR cun importe de 150€, cofinanciados nun 40% pola Xunta de Galicia en nun 60% polas persoas que o soliciten (os particulares abonarán, polo tanto, 90€ para contar cun bono por valor de 150€), o que supón preto do 47%.
Nestes catro anos puxéronse en circulación máis de 47.000 bonos turísticos e mobilizáronse máis de 14M€: deles, durante a pandemia foron máis de 10M€ (5M€ co bono turístico sociosanitario e 5,8M€ no ano 2021), aos que se suman os 3M€ nos últimos dous anos.