A Xunta adxudica por máis de 930.000 euros as obras que completan a mellora da PO-234 entre Cerdedo-Cotobade e Ponte Caldelas
Estas imágenes pertenecen a xunta.gal
- As intervencións de reforzo da seguridade viaria centraranse no tramo da vía entre Laxoso e o cruce do Portasouto, incluíndo a mellora dos itinerarios peonís e da calzada
- Corrixirase o trazado e ampliarase a calzada ata os 7 metros de ancho, ademais de mellorar as interseccións dos viarios públicos coa estrada autonómica
- O obxectivo da Xunta é iniciar as obras no verán, cun prazo de execución de 8 meses
- Esta nova intervención da Xunta completa o acondicionamento desta vía que une os núcleos de Ponte Caldelas e Aguasantas, en Cerdedo-Cotobade, estando xa executadas as dúas fases anteriores cun investimento autonómico de preto de 1,25 M€
Santiago de Compostela, 4 de xullo de 2024
A Consellería de Vivenda e Planificación de Infraestruturas ven de adxudicar por 931.666€ o contrato para executar as obras de acondicionamento da estrada autonómica PO-234 entre Laxoso e o cruce do Portasouto, no concello de Ponte Caldelas.
Esta nova intervención na PO-234, que comunica Cerdedo-Cotobade e Ponte Caldelas, foi adxudicada á empresa Construcciones y Obras Taboada Ramos S.L.U.
O obxectivo da Xunta é comezar os traballos neste verán e cun prazo de execución de 8 meses.
Nesta actuación de reforzo da seguridade viaria, a Xunta completará a mellora da PO-234 entre Cerdedo-Cotobade e Ponte Caldelas.
En concreto, os traballos inclúen a mellora puntual do trazado, a mellora das interseccións das vías públicas coa estrada autonómica e a ampliación da calzada ata os 7 metros de ancho, acadándose 2 carrís de 3 metros e 2 beiravías de 0,50 metros; co obxecto de mellorar a seguridade viaria.
O investimento global desta nova intervención supera os 1,14 M€, tendo conta o pagamento dos predios precisos para executar a actuación, que abrangue o tramo de preto de 1,6 km da PO-234, entre os puntos quilométricos 2+580 e 4+150.
Tamén se intervirá nas interseccións e executaranse cunetas de seguridade e melloras da drenaxe transversal e lonxitudinal da vía. Ademais reporase a sinalización horizontal e vertical e as barreiras de seguridade flexibles.
Con esta actuación de reforzo da seguridade viaria, o Goberno galego completará o acondicionamento da PO-234, que conecta os núcleos de Ponte Caldelas e Aguasantas, no municipio de Cerdedo-Cotobade, cuxas dúas primeiras fases foron xa executadas e supuxeron un investimento autonómico de preto de 1,25 M€.
A mellora desta vía dividiuse en tres fases. Xa está a disposición dos veciños o tramo mellorado entre o cruce do Portasouto e Aguasantas e tamén está acondicionado o treito entre Ponte Caldelas e Laxoso.
