O Servizo Galego de Saúde garante o dereito das mulleres á interrupción voluntaria do embarazo en centros públicos das sete áreas sanitarias
- Ata a semana 22 de embarazo a interrupción pódese realizar en todas as áreas sanitarias
- Nos casos de interrupcións voluntarias por riba das 22 semanas, considerados de alta complexidade, Galicia realízaas todas en tres hospitais públicos de referencia
- Garántese tamén o dereito das mulleres a escoller un centro concertado, sexa por privacidade ou para evitar demoras ao ser un procedemento sanitario urxente
Santiago de Compostela, 27 de xuño de 2024
O director xeral de Asistencia Sanitaria do Servizo Galego de Saúde, Alfredo Silva, trasladou hoxe, na Comisión 5ª de Sanidade do Parlamento de Galicia, que a sanidade pública galega garante a posibilidade de realizar interrupcións voluntarias do embarazo en todas as áreas sanitarias e en todos os períodos de xestación e modalidades autorizadas pola lei.
En concreto, os casos de máis de 22 semanas, de maior complexidade, son asumidos por tres hospitais públicos como son o Álvaro Cunqueiro de Vigo, o Complexo Hospitalario de Ourense e o Complexo Hospitalario da Coruña. Entre as 14 e as 22 semanas pódense realizar nos hospitais públicos das sete áreas sanitarias e, antes das 14 semanas de xestación, a interrupción voluntaria do embarazo préstase nun centro da rede pública galega ou nunha das clínicas autorizadas polo Sergas dado que a lei contempla que as mulleres teñan dereito a escoller un centro con cargo á sanidade pública por motivos de privacidade ou para evitar demoras por considerarse un procedemento sanitario de urxencia.
Durante a intervención do director xeral de Asistencia Sanitaria, en alusión á derivación a Vigo dunha muller de Lugo, sinalou que se tratou dun único caso puntual e xustificado. "Todas as galegas, sexan de Lugo ou doutro lugar, teñen garantido este dereito e cúmprese integramente dentro da comunidade autónoma", sinalou Alfredo Silva.
Como mostra do incremento progresivo desta prestación en centros públicos, o director xeral sinalou que en 2022 as interrupcións voluntarias do embarazo realizadas na área sanitaria de Lugo en centros propios era do 59 % (un total de 198) e que o pasado ano se incrementaron ata o 78 % (270).
