A Xunta realiza labores de conservación en tres tramos de canles fluviais no concello de Carballo

Santiago de Compostela, 27 de xuño de 2024

A Consellería de Medio Ambiente e Cambio Climático, a través de Augas de Galicia, comezou a executar hoxe actuacións de conservación e mantemento en tres tramos de canles fluviais no concello de Carballo que suman máis de 3,7 quilómetros.

As tarefas, que se desenvolverán na parroquia de San Martiño de Razo, afectan ao río Monte Neme e aos regos de Oza e de Barcia e consisten na retirada de árbores e biomasa presente nas canles fluviais para evitar atoamentos así como en labores de roza puntual de arbustos no acceso ás canles.

As actuacións, que xa foron comunicadas ao concello, prolongaranse durante aproximadamente unha semana e realizaranse mediante a aplicación de ferramentas manuais, o uso de motoserras, podadoras e rozadoiras co apoio de maquinaria como un tractor e unha carretilla de carga.

Unha vez finalizadas as obras programadas polo organismo dependente do Executivo galego, estes tramos fluviais quedarán despexados de maleza, posibilitando así a circulación fluída das súas augas.

Augas de Galicia desenvolve este tipo de accións no marco do programa de mantemento, conservación e mellora do dominio público hidráulico das bacías de Galicia-Costa e nas súas zonas de acceso e protección. Neste caso trátase ademais do mantemento dunha zona catalogada como de alto risco potencial significativo de inundación.

O obxectivo é avanzar e mellorar os leitos fluviais para favorecer as condicións naturais do ecosistema dos ríos, actuando nas áreas nas que a Xunta ten competencias, fóra das tramas urbanas fluviais de responsabilidade municipal.