A Xunta conciencia a máis de 8.000 escolares sobre a importancia dos ríos cunha campaña divulgativa para achegar o ciclo da auga a centros de primaria
Estas imágenes pertenecen a xunta.gal
- A iniciativa, impulsada polo organismo Augas de Galicia, chegou durante este curso a 125 colexios no marco das actividades do Plan de xestión do risco de inundación
- Os centros educativos participantes foron seleccionados pola súa localización nalgún dos 100 concellos galegos con máis probabilidades de sufrir asolagamentos
Santiago de Compostela, 21 de xuño de 2024
A Xunta contribuíu a sensibilizar a máis de 8.000 escolares de entre 5 e 12 anos sobre o peso e a importancia que teñen os ríos para os ecosistemas e as consecuencias do seu posible desbordamento, no marco dunha campaña divulgativa dirixida a achegar o ciclo da auga a centros de Educación Primaria.
Impulsada polo organismo público Augas de Galicia e enmarcada no Plan de xestión do risco de inundación vixente, esta iniciativa púxose en marcha durante o curso 2023-2024 e chegou a un total de 125 colexios das catro provincias, co obxectivo de concienciar ás novas xeracións sobre os asolagamentos e a influencia que teñen as accións do ser humano nas contornas fluviais e no funcionamento das canles de auga.
A tal fin, o alumnado dos centros inscritos na campaña participaron en talleres dunha hora de duración nos que, de xeito ameno e didáctico, técnicos especializados lles explicaron diferentes conceptos relacionados co ciclo da auga, a dinámica dos ríos e fenómenos relacionados cos mesmos, así como os seus posibles efectos.
Para acompañar a actividade e reforzar a mensaxe, a campaña apoiouse tamén nun vídeo divulgativo, Aventura dunha pinga, no que a súa protagonista, a pinga Xistra, explica as inundacións como procesos naturais e necesarios para o medio ambiente, pero que se poden volver perigosos para as persoas cando estas invaden espazos fluviais.
Os talleres realizados incluíron tamén experimentos científicos na propia aula e un xogo colectivo de preguntas e respostas para verificar os coñecementos adquiridos.
Posible segunda edición
Todos os colexios participantes nesta primeira campaña de concienciación sobre as inundacións pertencían a concellos localizados en Áreas con risco potencial significativo de inundación (ARPSI) da demarcación hidrográfica de Galicia-Costa. Nesta conca hai un cento de municipios con ARPSIS nos que se contabilizan un total de 266 centros de Primaria, polo que a Xunta valorará a posibilidade de repetir a campaña divulgativa o próximo curso, co fin de poder chegar a máis colexios nestas zonas.
Por último, cómpre lembrar que a Consellería de Medio Ambiente e Cambio Climático traballa xa na elaboración dun novo Plan de xestión do risco de inundación para a conca Galicia-Costa co horizonte temporal 2028-2033 e que se enmarca na nova planificación estratéxica de Augas de Galicia a medio prazo.
O obxectivo deste instrumento é lograr unha actuación coordinada de todas as administracións públicas implicadas na xestión da auga e da sociedade en xeral para diminuír os riscos de inundación e as súas consecuencias. Para elo, o futuro plan tomará como punto de partida o estudo dos episodios de asolagamento rexistrados nos últimos anos, as medidas que xa se foron adoptando e as obras e actuacións executadas sobre o territorio para modificar o risco de sufrir este tipo de fenómenos.
A partir de aí fixaranse as zonas de maior perigosidade da conca e desenvolveranse novos mapas de áreas inundables, ademais de revisar os vixentes. Co fin de reducir o risco para a poboación, estableceranse medidas adaptadas a cada caso tales como a apertura de ríos actualmente canalizados, a ampliación de leitos fluviais para que teñan máis espazo para asumir as crecidas ou o deseño de zonas de inundación controlada.