Galicia Calidade apoia a campaña de promoción dos produtos do mar da Asociación Galega de Depuradoras

Cambados (Pontevedra), 19 de xuño de 2024

A directora-xerente de Galicia Calidade, Ana Méndez, participou esta tarde na xornada de presentación dos produtos do mar da Asociación Galega de Depuradoras (AGADE) que tivo lugar en Cambados, que conta co apoio da Xunta a través desta entidade. Esta campaña de promoción que comezou a inicios deste ano percorrerá todo o territorio galego con diversas activdades e showcookings.

Ana Méndez salientou a importancia da promoción dos produtos galegos e da concienciación a respecto do consumo dos produtos do mar e puxo en valor o crecente interese da gastronomía galega de calidade como recurso turístico de primeira orde. Neste momento, salientou que é preciso concienciar ao consumidor da importancia e da calidade destes produtos polo que animou a facelo. Baixo o lema Consume do noso, Agade está desenvolvendo por diversas vilas e cidades galegas actividades promocionais como showcookings e degustacións de produtos.

A directora-xerente da entidade dependente de Turismo de Galicia agradeceu a Agade o traballo realizado na defensa dos produtos do mar e salientou a importancia das certificacións de orixe e calidade, como Galicia Calidade, que lle aportan aos produtos amparados esa distinción e garantía nos mercados nacionais e internacionais.

Ademais, puxo en valor o traballo que está a facer a Xunta de Galicia para reforzar o papel turístico da enogastronomía. Como recordou, o deseño do Plan Territorial de Sustentabilidade Turística Enogastronomía de Galicia con fondos Next Generation está a permitir desenvolver intersantes iniciativas nos máis de 80 concellos nos que se están a levar a cabo plans de sustentabildiade turística ao redor deste recurso.

Showcookings e catas

A campaña presentada hoxe está impulsada por Agade, entidade formada por 45 empresas cunha facturación anual de máis de 300 millóns de euros e que supera os 1.000 empregos directos.  Son referente na defensa dos intereses da cadea de valor vencellada á depuración e comercialización dos produtos do marisqueo e a acuicultura. Nesta liña, a organización, presidida por Roberto Fariña, prevé levar esta campaña por todo o territorio galego con actividades como showcookings e catas coa finalidade de reforzar o prestixo e recoñecemento dos alimentos mariños galegos.