O Servizo Galego de Saúde publica a relación definitiva das listas de selección temporal de diversas categorías de persoal estatutario
- Rexistrouse un total de 2.517 inscricións
- Resultaron admitidas 2.359 persoas
- Correspóndense ás categorías ou especialidades de persoal licenciado sanitario de atención hospitalaria, médico de admisión e documentación clínica e médico de hospitalización a domicilio
- Entran en vigor a efectos de chamamentos mañá día 19 de xuño
- O 9,69 % foron novas inscricións realizadas despois da data límite de presentación do anterior proceso
Santiago de Compostela, 18 de xuño de 2024
O Diario Oficial de Galicia publica hoxe a relación definitiva coa orde de prelación e a puntuación obtidas polas persoas admitidas no proceso de elaboración das listas de selección temporal de diversas categorías ou especialidades de persoal licenciado sanitario de atención hospitalaria, médico de admisión e documentación clínica e médico de hospitalización a domicilio.
O total de aspirantes admitidos foi de 2.359. Por categorías, foron 2.191 en facultativos especialistas de área, 62 en médico de admisión e documentación clínica e 106 en médico de hospitalización a domicilio.
O número de novas inscricións en relación ao pasado ciclo é de 205 en facultativos especialistas de área, 18 en médico de admisión e documentación clínica e 21 en médico de hospitalización a domicilio.
As listas atópanse publicadas, á disposición dos interesados, na páxina web do Servizo Galego de Saúde, no apartado Emprego Público-Listaxes de persoal estatutario. Ademais, o estado de cada solicitude pode ser consultado polo aspirante no seu expediente electrónico persoal en Fides/expedient-e/sección de procesos.
De modo excepcional para estas categorías e especialidades, dada á proximidade da data de publicación destas listas coa data final de dispoñibilidade da inscrición editable no programa FIDES/expedient-e (30 de xuño), os aspirantes que desexen facer algunha modificación na súa inscrición de cara ao próximo proceso de actualización de listas, que terá lugar no ano 2025, poderán realizala ata o 31 de xullo de 2024
Entrarán en vigor a efectos de chamamentos o día 19 de xuño de 2024.
Próximas publicacións
Proximamente publicaranse as listas definitivas das seguintes categorías: enfermeiro especialista en enfermería de saúde mental, enfermeiro especialista en enfermaría do traballo, enfermeiro especialista en enfermería familiar e comunitaria, enfermeiro especialista en enfermería obstétrico-xinecolóxica (matrona), enfermeiro especialista en enfermería pediátrica, médico de familia, médico de urxencias hospitalarias, médico coordinador do 061, médico asistencial do 061, pediatra de atención primaria e técnico de saúde de atención primaria.
