A Xunta e a Plataforma de usuarios de media distancia de Renfe coinciden na urxencia de que o Goberno central cumpra os seus compromisos coa liña ferroviaria galega
![Imagen del artículo A Xunta e a Plataforma de usuarios de media distancia de Renfe coinciden na urxencia de que o Goberno central cumpra os seus compromisos coa liña ferroviaria galega](https://www.xunta.gal/documents/35297/1150804/20240618XuntanzaPlataformaMediaDistanciaRenfe1.jpg)
Estas imágenes pertenecen a xunta.gal
- O conselleiro de Presidencia, Xustiza e Deportes, Diego Calvo, reuniuse coa voceira da entidade, Iria Méndez
Santiago de Compostela, 18 de xuño de 2024
O conselleiro de Presidencia, Xustiza e Deportes, Diego Calvo, reuniuse coa voceira da Plataforma de usuarios de media distancia de Renfe, Iria Méndez, para coñecer as demandas deste colectivo en relación cos servizos ferroviarios de Galicia e trasladarllas ao Ministerio de Transporte e Mobilidade Sostible. Na reunión participou tamén a directora xeral de Mobilidade, Judit Fontela.
O conselleiro informou a Iria Méndez das distintas cartas remitidas ao ministro Óscar Puente, nas que se insistía na urxencia de manter un encontro para abordar as necesidades e carencias das liñas de ferrocarril en Galicia, sen obter resposta. Mesmo a semana pasada, Diego Calvo daba conta no Parlamento de Galicia dos numerosos incumprimentos do Goberno central na materia e instaba á materialización dos compromisos para garantirlle á poboación galega as frecuencias, as prazas e as reducións de tempos de viaxe anunciados.
Nesta liña, a Xunta leva reclamando desde hai tempo ao Ministerio melloras tanto no que se refire aos servizos, mellorando a puntualidade, fiabilidade e aumento de frecuencias no eixe Atlántico, nas conexións interiores de Galicia e da alta velocidade a Madrid, como nas infraestruturas ferroviarias, coa mellora das conexións A Coruña-Ferrol-Lugo e Lugo-Ourense, a adecuación aos estándares do Corredor Atlántico da liñas León-Monforte-Ourense-Vigo, e a finalización das obras de alta velocidade dentro de Galicia.