A Xunta oferta 657 prazas de formación sanitaria especializada, o maior número da historia de Galicia
- O número de prazas ofertadas increméntase en 19 respecto do exercicio anterior
- A Administración galega financiará integramente a formación destes profesionais, un obxectivo ao que este ano se dedican 78 millóns
- Galicia oferta o 100% das prazas acreditadas, un total de 234, nas especialidades de medicina familiar e comunitaria e en pediatría
Santiago de Compostela, 17 de xuño de 2024
A Xunta ofertará o maior número de prazas de formación sanitaria da historia de Galicia, cun total de 657, destinadas aos profesionais sanitarios con titulación universitaria de grao/licenciatura/diplomatura en Medicina, Farmacia, Enfermería e do ámbito da Psicoloxía, Química, Bioloxía e Física.
Así se desprende dun informe da Consellería de Sanidade sobre a oferta 2024/2025 de prazas de formación sanitaria especializada en Galicia que hoxe abordou o Executivo galego na súa reunión semanal.
Estas prazas son 19 máis que as ofertadas no exercicio anterior (638). Das 657 prazas ofertadas, 505 son de especialidades médicas e as restantes son 113 de enfermería, 15 de farmacia, 2 de física, 15 de psicoloxía, 4 de química e 3 de bioloxía.
Galicia oferta o 100% das prazas acreditadas, un total de 234, nas especialidades de medicina familiar e comunitaria (207) e de pediatría (27), que son nas que existe unha maior necesidade de profesionais.
No que atinxe á especialidade de medicina familiar e comunitaria, nas cinco últimas convocatorias ofertáronse a totalidade das prazas acreditadas nas que, ademais, se produciu un significativo aumento, pasando das 142 (2020-2021) ás 207 actuais.
Na convocatoria tamén se ofertan o 100% das prazas acreditadas nas especialidades de cirurxía oral e maxilofacial, cirurxía pediátrica, endocrinoloxía e nutrición, xeriatría, inmunoloxía, medicina interna, medicina nuclear, neurocirurxía, neurofisioloxía clínica, neuroloxía, oncoloxía radioterápica, radiodiagnóstico, radiofísica hospitalaria, medicina preventiva, matronas, psiquiatría, psiquiatría infantil e da adolescencia, psicoloxía clínica, enfermería pediátrica e enfermería xeriátrica.
As necesidades das distintas especialidades non son sempre as mesmas polo que, na serie histórica sobre o total das distintas especialidades, ningunha comunidade autónoma, nin a propia Administración Xeral do Estado, convoca nunca o 100% das prazas acreditadas.
Así mesmo, no caso das especialidades relacionadas coa saúde mental prodúcese un incremento do 7,7% no número de prazas respecto do pasado ano, até acadar un total de 56, fronte ás 52 da oferta anterior. En concreto, serán 18 en psiquiatría (1 máis); 2 en psiquiatría infantil e da adolescencia (1 máis); 15 de psicoloxía clínica (1 máis respecto 2023); e 21 de enfermería especializada en saúde mental (1 máis).
Cómpre destacar que a presente oferta será financiada de xeito íntegro con recursos da Administración autonómica galega, tal e como vén facendo, cun investimento neste ano 2024 de 78 millóns de euros.
Nesta convocatoria obtívose en Galicia a acreditación de 16 novas prazas. En concreto, para a unidade docente do Complexo Hospitalario Universitario de Vigo, son 2 de enfermería de saúde mental, 2 de enfermería xeriátrica, 1 de oncoloxía médica, 1 de psicoloxía clínica, 1 de psiquiatría e 1 de psiquiatría infantil e da adolescencia.
Para a unidade docente do Complexo Hospitalario Universitario de Pontevedra, son de nova acreditación 1 praza de medicina intensiva e 1 de neumoloxía. Para a unidade docente do Complexo Hospitalario Universitario de Santiago, 2 de enfermería de saúde mental e 1 de farmacia.
Ademais, son prazas de nova acreditación, 1 de medicina intensiva para o Complexo Hospitalario Universitario de Ourense; 1 de oncoloxía médica para o Complexo Hospitalario Universitario de Ferrol e 1 tamén de oncoloxía médica para o Complexo Hospitalario Universitario de Lugo.
Reclamación ao Ministerio de Sanidade
Como se pode desprender destes datos, a Xunta continúa a facer cos seus recursos un esforzo para incrementar a capacidade de formación de especialistas co obxectivo de prestar servizos sanitarios de calidade. Porén, o Goberno galego ten que continuar reclamando do Ministerio de Sanidade que tamén leve a cabo as accións que lle corresponde no marco das súas competencias para, deste xeito, mellorar o sistema de formación sanitaria especializada.
Entre estas medidas que debe realizar o Goberno central está mellorar o sistema de selección para evitar que resulten prazas vacantes despois da resolución da convocatoria, eliminando as rixideces do sistema de elección electrónica e a nota de corte no exame que impida que médicos que aspiran a algunha das prazas convocadas quede sen posibilidade de elección, mentres existan prazas sen cubrir.
Así mesmo, debe modificar o procedemento e os criterios de acreditación de prazas para a súa flexibilización, sobre todo nas especialidades deficitarias. O que se trata é de facilitar o incremento de unidades nas que levar a cabo esta formación.
Xunto ao anterior, a Xunta pídelle ao Ministerio que axilice a creación da especialidade de Medicina de Urxencias e Emerxencias, polo seu impacto directo sobre a atención primaria e, ademais, debe o Goberno central incorporar un rexistro de profesionais de todo o Sistema Nacional de Saúde que permita a planificación das convocatorias de xeito global.
A Xunta destaca o labor dos profesionais que colaboran coa docencia: o esforzo de xefes de estudo, titores e colaboradores docentes é imprescindible para que poida manterse a alta calidade na formación de especialistas.
| PRAZAS OFERTA (FSE) GALICIA | 2023-2024 | 2024-2025 |
| ALERGOLOXÍA | 2 | 2 |
| ANÁLISES CLÍNICAS | 5 | 5 |
| ANATOMÍA PATOLÓXICA | 5 | 5 |
| ANESTESIOLOXÍA E REANIMACIÓN | 20 | 20 |
| ANXIOLOXÍA E CIRURXÍA VASCULAR | 5 | 5 |
| APARELLO DIXESTIVO | 7 | 8 |
| BIOQUÍMICA CLÍNICA | 0 | 0 |
| CARDIOLOXÍA | 8 | 8 |
| CIRURXÍA CARDIOVASCULAR | 1 | 2 |
| CIRURXÍA XRAL. E DO APARELLO DIXESTIVO | 13 | 13 |
| CIRURXÍA ORAL E MAXILOFACIAL | 1 | 1 |
| CIRURXÍA ORTOPÉDICA E TRAUMATOLOXÍA | 12 | 14 |
| CIRURXÍA PEDIÁTRICA | 2 | 2 |
| CIRURXÍA PLÁSTICA ESTÉTICA E REPARADORA | 3 | 2 |
| CIRURXÍA TORÁCICA | 1 | 2 |
| DERMATOLOXÍA MÉDICO-CIRÚRXICA | 5 | 5 |
| ENDOCRINOLOXÍA E NUTRICIÓN | 6 | 6 |
| FARMACIA HOSPITALARIA | 9 | 10 |
| FARMACOLOXÍA CLÍNICA | 0 | 0 |
| XERIATRÍA | 4 | 4 |
| HEMATOLOXÍA E HEMOTERAPIA | 8 | 8 |
| INMUNOLOXÍA | 1 | 1 |
| MEDICINA FÍSICA E REHABILITACIÓN | 5 | 5 |
| MEDICINA INTENSIVA | 9 | 11 |
| MEDICINA INTERNA | 19 | 19 |
| MEDICINA NUCLEAR | 1 | 2 |
| MICROBIOLOXÍA E PARASITOLOXÍA | 5 | 6 |
| NEFROLOXÍA | 5 | 5 |
| PNEUMOLOXÍA | 7 | 8 |
| NEUROCIRURXÍA | 3 | 3 |
| NEUROFISIOLOXÍA CLÍNICA | 3 | 3 |
| NEUROLOXÍA | 8 | 9 |
| OBSTETRICIA E XINECOLOXÍA | 10 | 10 |
| OFTALMOLOXÍA | 9 | 9 |
| ONCOLOXÍA MÉDICA | 6 | 10 |
| ONCOLOXÍA RADIOTERÁPICA | 3 | 3 |
| OTORRINOLARINGOLOXÍA | 6 | 6 |
| PEDIATRÍA E ÁREAS ESPECÍFICAS | 27 | 27 |
| RADIODIAGNÓSTICO | 20 | 20 |
| RADIOFÍSICA HOSPITALARIA | 2 | 2 |
| REUMATOLOXÍA | 4 | 4 |
| UROLOXÍA | 7 | 8 |
| MEDICINA FAMILIAR E COMUNITARIA | 207 | 207 |
| ENFERMERÍA FAMILIAR E COMUNITARIA | 52 | 53 |
| MEDICINA PREVENTIVA | 5 | 5 |
| MEDICINA DO TRABALLO | 6 | 4 |
| ENFERMERÍA DO TRABALLO | 2 | 0 |
| MATRONAS | 20 | 20 |
| PSIQUIATRÍA | 17 | 18 |
| PSIQUIATRÍA INFANTIL E DA ADOLESCENCIA | 1 | 2 |
| PSICOLOXÍA CLÍNICA | 14 | 15 |
| ENFERMERÍA SAÚDE MENTAL | 20 | 21 |
| ENFERMERÍA PEDIÁTRICA | 15 | 15 |
| ENFERMERÍA XERIÁTRICA | 2 | 4 |
| TOTAL | 638 | 657 |
