A Xunta inicia o envío de invitacións na área sanitaria de Ferrol para participar no proxecto piloto de cribado de cancro de próstata
- Cada mes enviaranse 1.000 invitacións por SMS ou carta ata chegar a 12.000 homes de entre 50 e 69 anos
- Os participantes serán citados para a extracción dunha mostra de sangue e seguirán o protocolo do programa, en función do resultado de antíxeno prostático específico e as demais probas de estratificación do risco
- A actuación enmárcase nun proxecto europeo no que participan, ademais de Galicia, Cataluña e os países de Irlanda, Polonia e Lituania, sendo a comunidade galega a primeira en dar comezo ao proxecto
Santiago de Compostela, 17 de xuño de 2024
A Consellería de Sanidade, a través da Dirección Xeral de Saúde Pública, comezou hoxe o envío de invitacións para participar no proxecto piloto de cribado de cancro de próstata que se pon en marcha na área sanitaria de Ferrol co obxectivo de mellorar o diagnóstico precoz e valorar a súa extensión ao resto de Galicia.
O proxecto piloto de cribado de cancro de próstata, un tumor que causa 500 mortes cada ano na comunidade galega, está dirixido a 12.000 homes de entre 50 e 69 anos deste área sanitaria.
A partir de hoxe luns, a poboación diana comezará a recibir mensaxes SMS ou, no caso de non ter rexistrado o número de teléfono na súa tarxeta sanitaria, cartas para participar no cribado.
As invitacións faranse unha vez ao mes a 1.000 homes durante un ano. As comunicacións conterán unha ligazón con información do cribado e ofrecerase un número de teléfono específico, atendido por persoal técnico do Servizo de Detección Precoz de Enfermidades da Consellería de Sanidade, para que os convidados poidan resolver posibles dúbidas.
Aqueles que acepten participar serán citados para extracción de mostra de sangue e seguirán o protocolo en función do seu resultado de antíxeno prostático específico. No caso de que ese resultado supere o límite establecido, os pacientes serán remitidos ao servizo de uroloxía para facer as probas correspondentes coas que estratificar o risco de padecer cancro de próstata.
Este cribado enmárcase no proxecto europeo PRAISE-U (sensibilización sobre o cancro de próstata e iniciativa para a detección na UE, nas súas siglas en inglés) co que se pretende mellorar o diagnóstico precoz desta enfermidade, reducir os falsos positivos que se detectan cos controis actuais e diminuír tratamentos innecesarios.
Galicia será a primeira rexión en dar comezo ao proxecto, no que tamén participan Cataluña (Manresa), Lituania, Polonia e Irlanda.
Ademais, o proxecto investigará o impacto psicosocial e as percepcións dos participantes sobre o cribado que inclúe diversas probas que se van realizar para estratificar o risco en función do resultado previo da análise sanguínea.
Con indicadores que midan a taxa de cobertura do programa piloto en Ferrol, da participación, a positividade da proba de antíxeno prostático, a taxa de detección ou as características dos cancros detectados, no primeiro semestre de 2026 realizarase unha avaliación para valorar a súa ampliación ao resto de Galicia.
O proxecto PRAISE-U conta cun financiamento total de máis de 12 millóns de euros, dos cales 1.362.000 euros correspóndense co piloto que se desenvolve en Ferrol. Este proxecto está cofinanciado pola Unión Europea, a través do Programa Horizonte 2021-2027.
