A Xunta inviste máis de 752.000 euros en mantemento do inmoble de vivendas de promoción pública da rúa Ribeira Sacra 15 a 21, na Coruña
- Substituirase a cuberta do edificio e repararanse e impermeabilizaranse a cuberta dos núcleos de comunicación vertical así como a substitución das claraboias
- As empresas interesadas neste contrato poderán presentar as súas propostas ata o vindeiro día 8 de xullo
Santiago de Compostela, 14 de xuño de 2024
A Xunta de Galicia destinará 752.299 euros ás obras de mantemento do inmoble de vivendas de promoción pública construído nos números 15 a 21 da rúa Ribeira Sacra, no polígono de Mesoiro, no concello da Coruña.
Con tal fin, a Consellería de Vivenda e Planificación de Infraestruturas, a través do Instituto Galego da Vivenda e Solo, licitou a obra de substitución da cuberta e reparación das cubertas dos núcleos de comunicación.
A intervención obxecto deste contrato consistirán no desmontado das pranchas de zinc preexistentes na cuberta do edificio e a colocación dun novo acabado constituído por paneis de aceiro tipo sándwich, con illamento intermedio.
As obras, tamén, incluirán a reparación e impermeabilización das cubertas dos núcleos de comunicación vertical así como a substitución das claraboias.
As empresas interesadas neste contrato poderán presentar as súas propostas ata o vindeiro día 8 de xullo.
