Belén do Campo anima aos particulares a solicitar as axudas para a creación de 20 novas casas do maior no rural galego
- O orzamento é de 1,3 millóns de euros e permitira a creación de 100 prazas totalmente gratuítas para persoas maiores de 60 anos en concellos que non teñen servizos de atención diúrna
- O obxectivo é rematar o ano con 143 casas en funcionamento por todo o territorio galego
- Na comarca de Santiago están operativos 10 centros deste tipo nos concellos de Boqueixón, Frades, Santiso, Toques, Tordoia e Val do Dubra
- Esta convocatoria, aberta ata o 24 de xuño. contempla como novidade o establecemento dunha axuda complementaria de 150 euros semanais por maternidade ou paternidade
Boqueixón (A Coruña), 12 de xuño de 2024
A delegada da Xunta da Coruña, Belén do Campo, e o alcalde de Boqueixón, Ovidio Rodeiro, visitaron hoxe as casas do maior de Lodeiro e Carabán, nas que os seus usuarios reciben unha atención personalizada preto das súas vivendas. A representante do Goberno autonómico destacou a importancia destes servizos para garantir uns coidados de calidade e gratuítos aos maiores que residen no rural. Neste senso, apuntou que, nestes momentos, na comarca de Santiago están operativos 10 centros deste tipo nos concellos de Boqueixón (2), Frades (2), Santiso (1), Toques(1), Tordoia (3) e Val do Dubra (1).
Durante a visita Belén do Campo animou aos particulares a solicitar as axudas para a creación de 20 novas casas do maior. A Xunta destina 1,3 millóns de euros a esta convocatoria que permitirá a posta en funcionamento de 100 prazas 100% gratuítas para persoas maiores de 60 anos que viven en concellos de menos de 5.600 habitantes que non contan con servizos de atención diúrna.
Con esta nova convocatoria, Galicia rematará o ano con 143 casas do maior. Unha medida pioneira que Executivo autonómico comezou a implantar no ano 2018 e na que desde entón leva investidos 22,4 millóns de euros. Os promotores destes recursos reciben subvencións para as obras de acondicionamento dos inmobles nos que prestarán o servizo, para o mantemento da actividade e para o desprazamento dos usuarios. Así mesmo e como novidade, esta orde establece unha axuda complementaria de 150 euros semanais nos casos de baixa de maternidade ou paternidade da persoa encargada da casa do maior.
As persoas interesadas en poñer en marcha unha casa do maior teñen ata o 24 de xuño presentar as súas solicitudes a través do formulario dispoñible na sede electrónica da Xunta.
