A Xunta emite en prazo os informes sectoriais precisos para conceder a licenza que permita comezar co desmantelamento da térmica pontesa
- Lorenzana explicou que a concesión da licenza municipal para poder acometer os traballos de desmantelamento tan só está pendente do cumprimento por parte de Endesa do requirimento efectuado polo Concello de As Pontes
- A titular de Economía avanzou o compromiso da empresa de, unha vez obtida a licenza, axilizar todos os trámites previos á contratación dos traballadores e simultanear as entrevistas de traballo con tarefas previas como o Plan de residuos ou o Plan de seguridade e saúde laboral
Santiago de Compostela, 11 de xuño de 2023
A conselleira de Economía e Industria, María Jesús Lorenzana, presidiu esta tarde unha reunión de traballo no seo da Mesa para o impulso da actividade económica das Pontes. Un encontro ao que asistiron representantes de Endesa; os sindicatos CCOO, UGT e CIG; o Concello de As Pontes e a delegada da Xunta en Ferrol, Martina Aneiros.
O obxectivo da xuntanza era coñecer de primeira man o estado no que se encontra nestes momentos o plan de traballo das tarefas de predesmantelamento e desmantelamento da térmica pontesa. Unha transición que, segundo explicou Lorenzana tras o encontro, se producirá entre os días 15 e 20 deste mes de xuño.
Nesta liña, a conselleira subliñou que a Xunta emitiu en prazo a totalidade dos informes sectoriais necesarios para a emisión da licenza que permita comezar co desmantelamento e louvou o traballo conxunto entre administracións para sacar adiante toda a parte de tramitación administrativa en tempo. Segundo apuntou, agora tan só resta que Endesa atenda o requirimento efectuado polo Concello das Pontes para obter o permiso para poder continuar coas tarefas. "Se se cumpre ese requirimento, estaría en prazo para comezar nesas datas eses novos traballos que darían continuidade ao emprego", insistiu.
"O que pretendemos é garantir a totalidade dos empregos dos traballadores da industria auxiliar da térmica pontesa - subliñou a conselleira de Economía e Industria - e obtivemos o compromiso de Endesa de realizar a formación de prevención de riscos laborais durante este mes para que todos os traballadores que interviñeron durante a fase de predesmantelamento estean en condicións de poder pasar a esa fase de desmantelamento e sobre todo que se inicien canto antes estes novos traballos", engadiu.
Nesta liña, María Jesús Lorenzana apuntou que a empresa anunciou a súa intención de, unha vez obtida a licenza para a realización da segunda fase, a de desmantelamento, axilizar todos os trámites previos á contratación do persoal traballador. Nomeadamente, o Plan de residuos e o Plan de seguridade e saúde laboral co obxectivo, subliñou a titular de Economía e Industria, de que "os contratos se poidan encadear da maneira máis áxil".
Finalmente, Lorenzana manifestou que o Goberno galego "continuará traballando en todos os proxectos industriais que se teñen que ir instalando nesta zona de As Pontes" e que deberían de ir acompasados coas tarefas de desmantelamento da térmica pontesa.
